پنجاب انسٹی ٹیوٹ آف نیوروسائنسز میں ایف سی پی ایس اسپائن سرجری کی منظوری

سی پی ایس پی کی طرف سے اسپائن سرجری کی منظوری میڈیکل تعلیم و تحقیق میں ایک اہم پیش رفت ہے‘پروفیسر ڈاکٹر آصف بشیر

ہفتہ 19 جولائی 2025 17:40

لاہور (اُردو پوائنٹ اخبارتازہ ترین - این این آئی۔ 19 جولائی2025ء) پنجاب انسٹی ٹیوٹ آف نیوروسائنسز (پنز) لاہور میں ایف سی پی ایس اسپائن سرجری کی اجازت دے دی گئی۔ایگزیکٹو ڈائریکٹر پنز،پروفیسر ڈاکٹر آصف بشیر نے بتایا کہ کالج آف فزیشنز اینڈ سرجنز پاکستان کی طرف سے (پنز) لاہور میں ایف سی پی ایس اسپائن سرجری ٹریننگ کی باقاعدہ منظوری ملک میں میڈیکل تعلیم و تحقیق کے میدان میں ایک اہم پیش رفت ہے، جس سے ینگ نیورو سرجنز کے لئے نئے مواقع میسر آئیں گے۔

ادارے کے ہیلتھ کئیر پروفیشنلز کو خراجِ تحسین پیش کرتے ہوئے انہوں نے کہاکہ یہ منظوری پنز کے لیے ایک اعزاز ہے، جس کا کریڈٹ پنز کی پوری کی پوری ٹیم کو جاتا ہے جنہوں نے دن رات محنت کر کے یہ مقام حاصل کیا۔ڈاکٹر آصف بشیر نے کہا کہ اس منظوری سے نہ صرف مریضوں کو اسٹیٹ آف دی آرٹ طبی سہولیات کی فراہمی ممکن ہو گی بلکہ ادارے میں نوجوان نیورو سرجنز کو بین الاقوامی معیار کی بہترین ٹریننگ سہولیات بھی فراہم کی جا سکیں گی تاکہ وہ مستقبل میں اسپائن سرجری کے میدان میں عالمی سطح پر پاکستان کا نام روشن کر سکیں۔

(جاری ہے)

انہوں نے مزید کہا کہ پنجاب انسٹی ٹیوٹ آف نیورو سائنسز پبلک سیکٹر کا واحد ادارہ ہے جہاں اسپائن سرجری 24 گھنٹوں کے اندر کی جاتی ہے، تاکہ مریضوں کو بروقت علاج کی سہولت مل سکے اور وہ جلد صحتیاب ہو سکیں، پنز کو عالمی سطح پر تسلیم شدہ ادارہ بنانے کے لیے تمام وسائل بروئے کار لائے جا رہے ہیں، اور یہ منظوری اسی سمت میں ایک اہم قدم ہے۔