پاکستان اور آذربائیجان کا تجارتی ریل رابطے مضبوط بنانے کے لیے ورکنگ گروپس کی تشکیل پر اتفاق

ہفتہ 19 جولائی 2025 20:12

اسلام آباد(اُردو پوائنٹ اخبارتازہ ترین - این این آئی۔ 19 جولائی2025ء) پاکستان اور آذربائیجان نے تجارتی ریل رابطے مضبوط بنانے کے لیے ورکنگ گروپس کی تشکیل پر اتفاق کیا ہے ۔پاکستان اور آذربائیجان کے درمیان ریل اور تجارتی رابطوں کی مضبوطی اور فروغ کے لیے اعلی سطح اجلاس ہوا۔ وزیر مملکت برائے ریلوے و خزانہ بلال اظہر کیانی کی صدارت میں اجلاس وزارت ریلوے میں منعقد ہوا۔

وزیر مملکت بلال اظہر کیانی نے کہا کہ وزیراعظم شہباز شریف ریلوے کی ترقی اور اسے جدید بنانے کیلیے جامع حکمت عملی پر عمل پیرا ہیں۔

(جاری ہے)

پاکستان آذربائیجان کے ساتھ ریل کے ذریعے تجارتی روابط کے فروغ کو نہایت اہمیت دیتا ہے۔سیکرٹری ریلوے سید مظہر علی شاہ، سیکرٹری ریلوے بورڈ محمد یوسف کے علاوہ ایس آئی ایف سی، این ایل سی، بحری امور اور اسٹیٹ بینک کے اعلیٰ حکام بھی اجلاس میں شریک ہوئے جبکہ ڈپٹی چیئرمین عارف آغایف کی قیادت میں آذربائیجان کی ٹیم نے وڈیو لنک کے ذریعے اجلاس میں شرکت کی۔

سیکرٹری ریلوے بورڈ محمد یوسف نے پاکستان ریل کے نیٹ ورک سے متعلق آگاہ کیا۔ اجلاس میں ازبکستان، افغانستان، پاکستان ریل معاہدے پر بھی تبادلہ خیال کیا گیا۔فریقین نے اجلاس میں مشترکہ ورکنگ گروپس بنانے پر اتفاق کیا۔