بلوچستان میں پسند کی شادی کرنے والا جوڑا غیرت کے نام پر سرعام قتل، ویڈیو وائرل

مبینہ طور پر یہ انسانیت سوز واقعہ صوبائی دارالحکومت کوئٹہ سے صرف چند ہی کلومیٹر کے فاصلے پر پیش آیا

ساجد علی اتوار 20 جولائی 2025 16:38

بلوچستان میں پسند کی شادی کرنے والا جوڑا غیرت کے نام پر سرعام قتل، ویڈیو ..

کوئٹہ ( اُردو پوائنٹ اخبارتازہ ترین۔ 20 جولائی 2025ء ) صوبہ بلوچستان میں پسند کی شادی کرنے والے جوڑے کو غیرت کے نام پر سرعام قتل کردیا گیا جس کی ویڈیو سول میڈیا پر وائرل ہوگئی۔ تفصیلات کے مطابق سوشل میڈیا پر وائرل ہونے والی ویڈیو کے حوالے سے کہا جارہا ہے کہ یہ واقعہ مبینہ طور پر بلوچستان کے علاقہ ڈغاگاری کا ہے اور یہ علاقہ صوبائی دارالحکومت کوئٹہ سے صرف چند ہی کلومیٹر کے فاصلے پر واقع ہے جہاں یہ انسانیت سوز واقعہ پیش آیا۔

بتایا گیا ہے کہ پسند کی شادی کرنے کے جرم میں جرگہ اکٹھا کرکے شیتل نامی لڑکی اور لڑکے زرک کو گولی مارنے کا حکم دیا گیا، جس پر شیتل کے بھائی جلال جلالی نے درجنوں مردوں کی موجودگی میں غیرت کے نام پر اپنی بہن اور اس سے پسند کی شادی کرنے والے لڑکے کو موت کے گھاٹ اتار دیا، غیرت کے نام پر ناصرف جوڑے کا سرعام قتل کیا گیا بلکہ اس واقعے کی ویڈیو بھی بنائی گئی جو سوشل میڈیا پر زیر گردش ہے۔

(جاری ہے)

❌ Could not extract embed code.

وزیراعلیٰ بلوچستان میر سرفراز بگٹی نے سوشل میڈیا پر مرد و خاتون کے بہیمانہ قتل کی وڈیو وائرل ہونے پر واقعہ کا سختی سے نوٹس لیتے ہوئے اس کی تحقیقات اوراس میں ملوث تمام ملزمان کی گرفتاری کا حکم دے دیا، ترجمان صوبائی حکومت نے عوام سے اپیل کی ہے کہ وہ وڈیو میں موجود ملزمان کی شناخت میں مدد کریں اور واقعہ میں ملوث افراد کی گرفتاری کے لئے اپنا ذمہ دارانہ معاشرتی کردار ادا کریں۔

ترجمان بلوچستان حکومت شاہد رند کا کہنا ہے کہ وزیراعلیٰ نے فوری طور پر واقعہ کی جامع تحقیقات کا حکم دیتے ہوئے قانون نافذ کرنے والے اداروں کو ہدایت کی ہے کہ جائے وقوعہ کا تعین کرکے اس واقعہ میں ملوث تمام افراد کو جلد از جلد گرفتار کر کے قانون کے کٹہرے میں لایا جائے، وزیر اعلیٰ نے کہا ہے ایسی سفاکانہ حرکات نہ صرف ناقابل برداشت ہیں بلکہ یہ معاشرتی اقدار اور انسانی وقار کی سنگین توہین بھی ہیں۔

ترجمان صوبائی حکومت نے مزید یہ بھی کہا کہ ریاست کی عملداری کو چیلنج کرنے والوں سے سختی سے نمٹا جائے گا، کسی کو قانون ہاتھ میں لینے کی اجازت نہیں دی جا سکتی، وڈیو میں دکھائی گئی بربریت ہر سطح پر قابل مذمت ہے اور حکومت بلوچستان اس ظلم پر خاموش تماشائی نہیں بنے گی، واقعہ میں ملوث عناصر کو انصاف کے تقاضوں کے مطابق قرار واقعی سزا دلوانے کے لئے تمام قانونی ذرائع بروئے کار لائے جائیں گے۔