ٹیسٹ ٹیموں کی تعداد محدود کرنے کا منصوبہ سامنے آگیا

سال 2027 کے بعد محدود ٹیموں کو ہی ٹیسٹ کھیلنے کی اجازت ملنے کا امکان ماہرین نے تین بڑے بورڈز آسٹریلیا، انگلینڈ اور بھارت کی اینٹی کرپشن معاملات میں مداخلت کو کھیل کیلیے تباہ کن قرار دیا ہے

ذیشان مہتاب پیر 21 جولائی 2025 13:34

لاہور (اردو پوائنٹ تازہ ترین اخبار ۔ 21 جولائی 2025ء ) ٹیسٹ ٹیموں کی تعداد محدود کرنے کا منصوبہ سامنے آگیا، آئی سی سی میٹنگز کے دوران نقصان میں جانے والی سائیڈز کو طویل فارمیٹ سے الگ کرنے کی تجویز سامنے آئی جبکہ ٹیموں کو 2 ڈویژن میں تقسیم کرنے پر بھی غور جاری ہے۔

تفصیلات کے مطابق 2027ء کے بعد محدود ٹیموں کو ہی ٹیسٹ کھیلنے کی اجازت ملنے کا امکان ہے، 1877ء میں آسٹریلیا اور انگلینڈ کے درمیان پہلا ٹیسٹ میچ کھیلا جانے سے لے کر آج تک صرف 12 ممالک کو ٹیسٹ اسٹیٹس دیا گیا ہے۔

ٹیسٹ فارمیٹ کو کرکٹ کی سب سے معتبر اور باوقار شکل سمجھا جاتا ہے لیکن وقت کے ساتھ محدود اوورز کی کرکٹ کی مقبولیت نے اس فارمیٹ متاثر کیا ہے، جس کی وجہ سے آئی سی سی نے اس طرز کی مقبولیت برقرار رکھنے کے لیے مختلف تجاویز پر غور شروع کر دیا ہے۔

(جاری ہے)

رپورٹ کے مطابق آئی سی سی 2027ء میں موجودہ فیوچر ٹور پروگرام کے اختتام پر ٹیسٹ کھیلنے والی ٹیموں کی تعداد محدود کرنے پر سنجیدگی سے غور کر رہی ہے، ٹیسٹ کرکٹ کو دو ڈویژنز میں تقسیم کرنے کی تجویز پر بھی غور جاری ہے جس پر حتمی فیصلہ رواں برس کے اختتام تک متوقع ہے تاہم اصل معاملہ یہ ہے کہ کون سی ٹیمیں ٹیسٹ کرکٹ کھیلتی رہیں گی اور کون سی ٹیمیں اس پیٹرن سے باہر ہو جائیں گی۔

آئی سی سی کی نئی پالیسی کا بنیادی نکتہ یہی ہے کہ وہی ٹیمیں ٹیسٹ کرکٹ جاری رکھ سکیں گی جو اس فارمیٹ سے مالی آمدن حاصل کر رہی ہیں، اس تناظر میں ’’بگ تھری‘‘ بھارت، آسٹریلیا اور انگلینڈ کی ٹیموں کو کسی خطرے کا سامنا نہیں ہوگا جبکہ نیوزی لینڈ اور پاکستان بھی محفوظ زون میں نظر آتے دکھائی دیتے ہیں،

ویسٹ انڈیز، زمبابوے، آئرلینڈ اور یہاں تک کہ جنوبی افریقا جیسے ممالک کو بھی مشکلات کا سامنا ہے۔

ان بورڈز کے لیے ٹیسٹ میچز کی میزبانی منافع بخش نہیں رہی بلکہ بعض اوقات انہیں نقصان کا سامنا کرنا پڑتا ہے۔

ذرائع کا کہنا ہے کہ کرکٹ آسٹریلیا، انگلینڈ اینڈ ویلز کرکٹ بورڈ و دیگر 6 بورڈز اور آئی سی سی کے نئے سی ای او سنجیو گپتا کی جانب سے مرتب کردہ عبوری سفارشات رواں سال کے اختتام پر چیئرمین آئی سی سی جے شاہ کو پیش کی جائیں گی، یہ سفارشات مستقبل میں ٹیسٹ کرکٹ کھیلنے کا سلسلہ جاری رکھنے والی ٹیموں کے انتخاب کی بنیاد بن سکتی ہیں۔