موجودہ قیادت نے بانی پی ٹی آئی کو جیل میں رکھنے میں مرکزی کردار ادا کیا ‘ فواد چودھری

لاہور (اُردو پوائنٹ اخبارتازہ ترین - این این آئی۔ 21 جولائی2025ء) سابق وفاقی وزیر اور پاکستان تحریک انصاف کے سابق رہنما فواد چودھری نے موجودہ پارٹی قیادت پر تنقید کرتے ہوئے کہا ہے کہ موجودہ قیادت نے بانی پی ٹی آئی کو جیل میں رکھنے میں مرکزی کردار ادا کیا ہے ،موجودہ قیادت کسی تحریک کی اہل نہیں اور عوامی حمایت حاصل کرنے میں ناکام ہے، اگر بانی پی ٹی آئی کے بیٹے ملک میں آکر سیاسی منظرنامے پر آتے ہیں تو صورتحال مختلف ہو سکتی ہے،تحریک انصاف کی ساری توجہ اپنے کارکنان اور قائدین پر ہونی چاہیے تھی،سیٹوں کی بندر بانٹ نے اصل مقصد سے ہٹا دیا، پارٹی کو سنجیدہ قیادت کی ضرورت ہے۔

لاہور ہائیکورٹ میں میڈیا سے گفتگو کرتے ہوئے انہوں نے کہا کہ مستقبل کی سیاست بانی پاکستان تحریک انصاف کے ساتھ ہے اور اصل مسئلہ ان کی رہائی ہے، بانی تحریک انصاف کی رہائی کے لئے کوششیں ہونی چاہیے تھیں مگر افسوس کہ موجودہ قیادت نے انہیں جیل میں رکھنے میں مرکزی کردار ادا کیا۔

(جاری ہے)

فواد چودھری نے واضح کیا کہ اگر بانی پی ٹی آئی باہر آتے ہیں تو ساری بندر بانٹ رک جائے گی اور پارٹی کو نئی سمت ملے گی۔

انہوں نے کہا کہ موجودہ قیادت کی موجودگی میں پارٹی کو کوئی بڑی کامیابی حاصل نہیں ہو سکتی بلکہ حکومت بھی اسی وجہ سے پرسکون ہے۔ موجودہ قیادت کسی تحریک کی اہل نہیں اور عوامی حمایت حاصل کرنے میں ناکام ہے، عالیہ حمزہ کا بھی تحریک میں کوئی کردار نہیں ہے، اگر بانی پی ٹی آئی کے بیٹے ملک میں آکر سیاسی منظرنامے پر آتے ہیں تو صورتحال مختلف ہو سکتی ہے۔

حکومت انہیں گرفتار نہیں کر سکے گی کیونکہ ان کی عالمی سطح پر ایک الگ حیثیت ہے، اب دیکھنا یہ ہے کہ انہیں ویزا ملتا ہے یا نہیں۔انہوں نے یہ بھی دعویٰ کیا کہ اگر وہ پشاور ایئرپورٹ پر اتریں گے تو لاکھوں لوگ ان کا استقبال کریں گے۔ فواد چوہدری نے عدلیہ کے کردار پر بھی سوالات اٹھاتے ہوئے کہا کہ جیسے ججز بلیک میل ہوئے، ویسے ہی عدالتی فیصلوں کی اب کوئی اہمیت نہیں رہی۔

آخر میں انہوں نے کہا کہ تحریک انصاف کو سنجیدہ، بصیرت رکھنے والی قیادت کی اشد ضرورت ہے تاکہ وہ اپنے اصل مقصد کی طرف واپس لوٹ سکے۔فواد چودھری کا کہنا تھا کہ پاکستان میں مزید سیاسی جماعتوں کی گنجائش نہیں، جو بھی نئی پارٹی بنے گی وہ ریحام خان کی پارٹی جیسی حیثیت رکھے گی۔فواد چودھری نے مزید کہا کہ ان کے خلاف مقدمات کی قانونی حیثیت نہیں اور اے ٹی سی کے فیصلے سے سیاسی درجہ حرارت مزید بڑھے گا۔