جہیز تنازع، ایک اور بھارتی خاتون یو اے ای میں مردہ پائی گئی

متوفیہ کے اہل خانہ نے شوہر پر جہیز کیلئے ہراساں کرنے کا الزام عائد کر دیا

پیر 21 جولائی 2025 18:01

نئی دہلی(اُردو پوائنٹ اخبارتازہ ترین - این این آئی۔ 21 جولائی2025ء)بھارتی ریاست کیرالہ کی ایک اور خاتون متحدہ عرب امارات میں مردہ پائی گئی ، متوفیہ کے اہل خانہ نے شوہر پر جہیز کیلئے ہراساں کرنے کا الزام عائد کر دیا۔بھارتی میڈیا رپورٹس کے مطابق متحدہ عرب امارات میں مردہ پائی جانے والی 29سالہ اتھولیا نامی خاتون کے شوہر کے خلاف کیرالہ پولیس نے مقدمہ درج کیا ہے۔

(جاری ہے)

مقدمہ متوفیہ کی والدہ کی مدعت میں درج کیا گیا، جس میں کہا گیا کہ اتھولیا کے شوہر ستیش نے اس کو تشدد کا نشانہ بنانے کے بعد گلا گھونٹ کر مار ڈالا۔والدہ نے ستیش پر الزام عائد کرتے ہوئے کہا کہ ستیش جہیز کیلئے اتھولیا کو ہراساں اور اس پر تشدد کرتا رہتا تھا۔مقتولہ کے اہل خانہ نے دعویٰ کیاکہ2014میں جب ان دونوں کی شادی ہوئی تھی تو اس وقت ایک موٹر سائیکل اور 43تولے سونا دینے کے باوجود ستیش ناکافی جہیز لانے پر اتھولیا کو تشدد کا نشانہ بناتا تھا۔پولیس کے مطابق شوہر ستیش کے خلاف بی این ایس اور جہیز امتناع ایکٹ 1961کی مختلف دفعات کے تحت مقدمہ درج کیا گیا ہے۔