ادارہ نظریہ پاکستان کے زیر اہتمام نظریاتی سمر سکول کی اختتامی تقریب

پیر 21 جولائی 2025 23:11

لاہور (اُردو پوائنٹ اخبارتازہ ترین - اے پی پی۔ 21 جولائی2025ء) ادارۂ نظریہ پاکستان کے زیر اہتمام منعقدہ نظریاتی سمر سکول کی اختتامی تقریب کے دوران طلبا وطالبات نے مختلف غیر نصابی سرگرمیوں کاعملی مظاہرہ کیا ۔وائس چیئرمین ادارۂ نظریہ پاکستان مشاہد حسین سید ، ممتاز سیاسی وسماجی رہنما مہناز رفیع،سابق نگران وزیر قانون احمر بلال صوفی اور میاں سلمان فاروق نے طلبہ کی ذہنی و تخلیقی کاوشوں کو سراہا اور ان کی حوصلہ افزائی کی۔

انہوں نے کہا کہ صحت مند قوم بنانے کیلئے غیر نصابی سرگرمیوں کا فروغ بہت ضروری ہے،ایسی سرگرمیاں طلبہ کی دماغی صلاحیتوں کو جلا بخشتی ہیں۔ تقریب کے دوران نظریاتی سمر سکول کے طلبہ نے سپورٹس انسٹرکٹرشاہد سہیل کی قیادت میں کراٹے میں اپنے فن کا خوبصورت مظاہرہ کیا۔

(جاری ہے)

طلبا وطالبات نے سائنس کے حوالے سے اپنی صلاحیتوں کابھی عملی مظاہرہ کیا۔

نظریاتی سمر سکول کے طلبہ نے اپنے ٹیچر آصف عمر کی رہنمائی میں مختلف سائنسی اشیا کے دلچسپ ماڈلز کے متعلق پریزنٹیشن بھی دی۔طلبا وطالبات کے تیارکردہ سائنسی اشیا کے ماڈل دیکھ کر سائنس میں ان کی گہری لچسپی کا اظہار ہوتا تھا۔علاوہ ازیں طلبا و طالبات نے آرٹ کے بنائے گئے خوبصورت فن پاروں کی نمائش بھی کی۔طلبہ نے آرٹ ٹیچر صدف سعید اور مریم کرامت کی رہنمائی میں معزز مہمانان گرامی کو آرٹ کے نمونوں بارے آگاہ کیا کہ کس طرح اپنے گھروں میں پڑی بیکار اشیا کو بھی اپنی محنت سے کارآمد بنا سکتے ہیں۔