لاہورسمیت بیشترشہروں میں بارشیں، دریائوں کے بالائی علاقوں میں موسلا دھار بارشوں کے امکانات ہیں، ترجمان پی ڈی ایم اے

منگل 22 جولائی 2025 20:55

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) پی ڈی ایم اے کے ترجمان کے مطابق صوبائی دارالحکومت لاہور سمیت پنجاب کے بیشتر شہروں میں بھی بادل برسیں گے،دریائوں کے بالائی علاقوں میں موسلا دھار بارشوں کے امکانات ہیں۔گزشتہ 24 گھنٹوں میں راولپنڈی 54 ملی میٹر، مری42 اور نارووال میں62 ملی میٹر بارش ریکارڈ کی گئی ۔اسی طرح جہلم سیالکوٹ، منگلا ،اٹک ،گجرات اور رحیم یار خان میں بھی بارشیں ریکارڈ کی گئی ۔

ترجمان کے مطابق پی ڈی ایم اے کے صوبائی کنٹرول روم سمیت ڈسٹرکٹ ایمرجنسی آپریشن سنٹرز کو الرٹ کر دیا گیا کیونکہ گجرات ،سیالکوٹ راولپنڈی، فیصل آباد ،گوجرانوالہ سرگودھا،ملتان،ساہیوال ،بہاولپور،جہلم، اٹک، چکوال، مری، گلیات، میانوالی، نارووال ، ٹوبہ ٹیک سنگھ، منڈی بہائوالدین اور ڈی جی خان میں تیز بارشیں متوقع ہیں۔

(جاری ہے)

مون سون بارشوں کا چوتھا سلسلہ25 جولائی تک جاری رہے گا۔

موسلا دھار بارش سے نشیبی علاقوں کے ندی نالوں میں طغیانی اور مری کے پہاڑی علاقوں میں لینڈ سلائیڈنگ کا خطرہ ہے۔سیاح اور مسافر پیشگوئی کی مدت کے دوران انتہائی محتاط رہیں، تیز بارش اور آندھی مخدوش و کچے مکانات کو نقصان پہنچا سکتی ہے،شہری موسم برسات میں احتیاطی تدابیر اختیار کریں اور محفوظ مقامات پر رہیں ۔ڈی جی پی ڈی ایم اے عرفان علی کاٹھیا نے متعلقہ اضلاع میں عملہ اور مشینری ہائی الرٹ رکھنے کی ہدایت کرتے ہوئے کہا کہ واسا ، میونسپل ادارے نشیبی علاقوں میں پانی ہرگز کھڑا نہ ہونے دیں، بارش کے دوران متعلقہ افسران فیلڈ میں موجود رہیں اور سرگرمیوں کی نگرانی کریں۔

ڈی جی عرفان علی کاٹھیا نے مزید کہا کہ شہری ہنگامی صورتحال میں پی ڈی ایم اے کی ہیلپ لائن1129 پر کال کریں۔