الیکشن کمیشن نے پارلیمانی نظام کو ناپید کر دیا ،سپیکر کے پی اسمبلی کے اختیارات کو سلب کیا ،رضا ربانی

منگل 22 جولائی 2025 22:05

اسلام آباد(اُردو پوائنٹ اخبارتازہ ترین - این این آئی۔ 22 جولائی2025ء)سابق چیئرمین سینیٹ میاں رضا ربانی نے کہاہے کہ الیکشن کمیشن نے پارلیمانی نظام کو ناپید کر دیا اورسپیکر کے پی اسمبلی کے اختیارات کو سلب کیا ہے۔جاری بیان میں میاں رضا ربانی نے کہا کہ الیکشن کمیشن نے چیف جسٹس پشاور ہائی کورٹ کو حلف کیلئے ایک شخص کو نامزد کرنے کا خط لکھا۔

(جاری ہے)

انہوںنے کہاکہ الیکشن کمیشن کے خط کی سخت مذمت کرتا ہوں، اس وقت ناقابل عمل حالات یا وجوہات موجود نہیں تھیں، گورنر کی طرف سے صوبائی اسمبلی کے منتخب ممبران کو حلف دلانا غیر ضروری تھا۔

رضا ربانی نے کہا کہ پارلیمانی پریکٹس میں کورم کی کمی ایک عام سی بات ہے، منتخب اراکین کی حلف برداری کو کسی بھی ادارے کے ذریعے تبدیل نہیں کیا جا سکتا، الیکشن کمیشن کی زیادتی نے پارلیمانی تاریخ میں بدصورت اور غیر آئینی نظیر قائم کی۔