Live Updates

دریائے راوی میں پانی کی سطح بلند ترین ریکارڈ، 2 لاکھ 20ہزار کیوسک پانی کا نکاس ہوا

دریائے راوی میں پانی کا بہاؤ 211330 سے 219760 کیوسک رہا، پارک ویوہاؤسنگ سوسائٹی کے 4 بلاکس میں پانی داخل، تمام رہائشیوں کو بروقت نکال لیا گیا

ثنااللہ ناگرہ جمعہ 29 اگست 2025 19:34

دریائے راوی میں پانی کی سطح بلند ترین ریکارڈ، 2 لاکھ 20ہزار کیوسک پانی ..

لاہور ( اردوپوائنٹ اخبار تازہ ترین۔ آئی پی اے ۔ 29 اگست 2025ء ) دریائے راوی میں تاریخ کی سب سے بلند ترین پانی کی سطح ریکارڈ کی گئی۔ شاہدرہ میں گزشتہ سات گھنٹوں کے دوران دو لاکھ 20ہزار کیوسک پانی کا نکاس ہوا۔ دریائے راوی میں پانی کا بہاؤ 211330 سے 219760 کیوسک رہا۔ وزیراعلیٰ پنجاب مریم نواز شریف کی ہدایت پر صوبے بھر کے سیلاب متاثرہ علاقوں میں ریسکیو ریلیف سرگرمیاں جاری ہیں۔

وزیراعلیٰ مریم نواز شریف کی ہدایت پر وزراءبھی متعلقہ اضلاع میں ریلیف سرگرمیوں شامل ہورہے ہیں۔ سیلاب متاثرہ علاقوں سے 24 گھنٹوں کے دوران 20 ہزار سے زائد افراد کا محفوظ انخلا مکمل کیا گیا۔ 9646 افراد کی ریسکیو ٹرانسپورٹیشن، 729 بوٹس اور 2897 ریسکیورز آپریشن میں شامل ہیں۔

(جاری ہے)

تھیم پارک، موہلنوال، مرید وال، فرخ آباد، شفیق آباد، افغان کالونی، نیو میٹر سٹی اور چوہنگ ایریا سے محفوظ انخلا کیا گیا۔

طلعت پارک بابوصابو میں ریسکیو اور ریلیف آپریشن جاری ہے۔ لاچیوالی سکول کے ریلیف کیمپ میں 70 سے زائد افراد مقیم ہیں۔ پارک ویو ہاؤسنگ سوسائٹی کے چار بلاکس میں پانی داخل ہونے پر تمام رہائشیوں کو بروقت نکال لیا گیا۔ بیشتر متاثرین چوہنگ ٹھوکرریلیف کیمپ میں مقیم ہیں جہاں ا ن کو قیام و طعام کی بہترین سہولتیں دی جارہی ہیں۔ وزیراعلیٰ مریم نواز شریف کی ہدایت پر ریسکیو اور ریلیف آپریشن رات بھر سے مسلسل جاری رہا۔

وزیراعلیٰ مریم نواز شریف نے تمام ٹیموں کو شاباش دی۔ دوسری جانب چیف سیکرٹری پنجاب زاہد اختر زمان کی زیرصدارت ایک ہنگامی اجلاس میں ڈی جی پی ڈی ایم اے نے اجلاس کو بتایا کہ مون سون کے نویں اسپیل کے دوران لاہور، گوجرانوالہ، راولپنڈی، سرگودھا، فیصل آباد، ڈی جی خان، بہاولپور، بہاولنگر اور ساہیوال میں بارشیں متوقع ہیں۔ اجلاس کو بتایا گیا کہ دریائے چناب میں پانی کا ایک بڑا ریلا جھنگ کی طرف بڑھ رہا ہے جبکہ دریائے راوی میں اس وقت 2 لاکھ 17 ہزار کیوسک کا سیلابی بہاؤ موجود ہے، تاہم آئندہ چند گھنٹوں میں بہاؤ میں کمی کی توقع ہے۔

اجلاس کے دوران فیصلہ کیا گیا کہ ننکانہ، شیخوپورہ، اور ٹوبہ ٹیک سنگھ کے دریائی بیلٹ کے علاقوں کو فوری طور پر خالی کروایا جائے تاکہ جانی نقصان سے بچا جا سکے۔