کراچی، کار شوروم پر فائرنگ کے بعد واٹس ایپ پر بھتے کی کال آ گئی

بدھ 23 جولائی 2025 15:28

کراچی(اُردو پوائنٹ اخبارتازہ ترین - این این آئی۔ 23 جولائی2025ء) گزشتہ روز نیو کراچی میں کار شوروم پر فائرنگ کے واقعے کا مقدمہ پولیس نے ملازم کی مدعیت میں درج کر لیا ہے۔تفصیلات کے مطابق گزشتہ روز نیو کراچی تھانے کی حدود میں ایک کار شوروم پر فائرنگ کی گئی تھی، جس کے بعد بھتہ خوروں کی جانب سے واٹس ایپ کال آ گئی۔پولیس رپورٹ میں کہا گیا ہے کہ نیو کراچی تھانے میں مقدمہ رینٹ اے کار کے ملازم کی مدعیت میں بھتہ خوری، اقدامِ قتل کی دفعات کے تحت درج کیا گیا ہے، جس میں گینگ وار وصی اللہ لاکھو، عبدالصمد کاٹھیا واڑی، جواد راجہ اور فائرنگ کرنے والے 2 موٹر سائیکل سوار ملزمان کو نامزد کیا گیا ہے۔

ایف آئی آر کے مطابق شوروم پر فائرنگ لیاری گینگ وار نے بھتہ خوری کے لیے کی، فائرنگ کے بعد ملزمان فرار ہو گئے، اور انھوں نے واٹس ایپ پر شوروم مالک سے بھتہ مانگا۔

(جاری ہے)

جس وقت فائرنگ کی گئی اس وقت مہران، عطا اللہ اور سلمان شوروم میں موجود تھے لیکن خوش قسمتی سے اس واقعے میں کوئی جانی نقصان نہیں ہوا، فائرنگ کے بعد بین الاقوامی نمبر سے کال آئی جس میں اس نے گینگ وار سے اپنا تعلق ظاہر کیا۔ بھتہ خور نے پیغام دیا کہ عمر فاروق یا سمیع اللہ رینٹ اے والے کو کہو کہ اپنا نمبر آن کرے اور بھتہ دے۔نیو کراچی پولیس نے مقدمہ درج کر کے مزید تحقیقات شروع کر دی ہے، ملزمان تک پہنچنے کے لیے سی سی ٹی وی فوٹیجز بھی حاصل کی جا رہی ہیں۔