Live Updates

منصوبہ سازوں کی سازش ہے کہ پی ٹی آئی کے اندر چیزوں کو متنازع بنایا جائے

کارکنوں کی سزاؤں کیخلاف قانونی جنگ اور تحریک دونوں چلائیں گی، احتجاجی تحریک کا حق آئین قانون دیتا ہے، منصوبہ ساز عمران خان کو مزید سزائیں دینا چاہتے ہیں، سیکرٹری جنرل پی ٹی آئی سلمان اکرم راجا

ثنااللہ ناگرہ بدھ 23 جولائی 2025 22:56

منصوبہ سازوں کی سازش ہے کہ پی ٹی آئی کے اندر چیزوں کو متنازع بنایا جائے

اسلام آباد ( اردوپوائنٹ اخبار تازہ ترین۔ آئی پی اے ۔ 23 جولائی 2025ء ) سیکرٹری جنرل پی ٹی آئی سلمان اکرم راجا نے کہا ہے کہ منصوبہ سازوں کی سازش ہے کہ پی ٹی آئی کے اندر چیزوں کو متنازع بنایا جائے، پی ٹی آئی رہنماؤں کی سزاؤں کیخلاف قانونی جنگ اور تحریک دونوں چلیں گی، احتجاجی تحریک چلانے کا حق آئین قانون دیتا ہے، منصوبہ ساز عمران خان کو مزید سزائیں دینا چاہتے ہیں۔

انہوں نے جیو نیوز کے پروگرام میں گفتگو کرتے ہوئے کہاکہ عمران خان کو پہلے بھی مقدمات میں سزا دی جاچکی ہے، منصوبہ سازوں کا مزید سزائیں دینے کا بالکل ارادہ ہے، ہمارے ہزاروں کارکنوں ووٹرز کے خلاف مقدمات قائم ہیں۔ مقدمات میں سزائیں دے کر فیئرٹرائل کو پامال کیا جارہا ہے جو کہ ایک سیاہ باب ہے۔ چیف جسٹس سپریم کورٹ کے پاس جارہے ہیں، ان کو خط بھی لکھا جائے گا، اور پٹیشن بھی دائر کریں گے کہ چیف جسٹس کے حکم کی وجہ سے یہ سب ہورہا ہے۔

(جاری ہے)

یہ نظر آرہا ہے کہ پی ٹی آئی رہنماؤں کو جیلوں میں ڈالنے کیلئے ایک ڈیڈلائن رکھی گئی ہے۔ جس سے پریس کانفرنس کی وہ پاک صاف ہوکر باہر آگیا، اگر9مئی مقدمات میں 30لوگوں کیخلاف فردجرم عائد ہوئی تھی تو ان میں دس نے پریس کانفرنس کی وہ باہر ہوگئے جبکہ باقی 20 کیخلاف مقدمات چل رہے ہیں۔ ہمارے لوگوں کے خلاف مقدمات چل رہے ہیں، منصوبہ سازوں کی سازش ہے کہ پی ٹی آئی کے اندر چیزوں کو متنازع بنایا جائے، 9مئی کیسز میں پی ٹی آئی رہنماؤں کو سزاؤں کے خلاف قانون جنگ اور تحریک دونوں چلیں گی۔

تاریخ میں تبدیلی سیاسی ورکر کے باہر نکلنے سے کبھی نہیں آتی، بلکہ پوری قوم کو نکلنا پڑتا ہے۔ احتجاجی تحریک چلانے کا حق آئین قانون دیتا ہے۔ دوسری جانب امیر جماعت اسلامی حافظ نعیم الرحمن نے سرگودھا میں پریس کانفرنس سے خطاب کرتے ہوئے کہا کہ عوامی مسائل پس پشت ڈال کر حکومت اور اپوزیشن اقتدار کی بندربانٹ کررہی ہے، پی ٹی آئی کارکنان مقدمات، گرفتاریوں سے دوچار ہیں جبکہ قیادت اقتدار کی نورا کشتی میں لگی ہوئی ہے۔ غیر جمہوری فیصلے سے حاصل کی گئی مخصوص نشستوں پر منتخب سینیٹرز متنازع ہیں۔