سینیٹر شیری رحمن کی زیر صدارت سینیٹ کی قائمہ کمیٹی برائے موسمیاتی تبدیلی کا اجلاس،موسمیاتی آفات کے خطرات سے نمٹنے کے لئے حکمت عملی پر غور

اسلام آباد (اُردو پوائنٹ اخبارتازہ ترین - اے پی پی۔ 23 جولائی2025ء) سینیٹ کی قائمہ کمیٹی برائے موسمیاتی تبدیلی کی چیئرپرسن سینیٹر شیری رحمان نے کہا ہے کہ 26 جون سے 22 جولائی تک پاکستان میں مون سون کی شدید بارشوں سے 242 جانیں ضائع ہو چکی ہیں جبکہ 598 افراد زخمی ہو چکے ہیں،گلگت بلتستان میں سیاحتی سرگرمیوں کو محدود کیا جانا چاہئے، آئندہ اجلاس میں صوبے زمینی پانی کے ری چارج، ٹیوب ویل ریگولیشن اور بارش کے پانی کی ذخیرہ اندوزی کے حوالے سے تازہ ترین اعداد و شمار اور منصوبے سامنے لائیں۔

ان خیالات کا اظہار انہوں نے بدھ کو سینیٹ کی قائمہ کمیٹی برائے موسمیاتی تبدیلی اجلاس کی صدارت کرتے ہوئے کیا۔کمیٹی کا اجلاس موسمیاتی آفات کے خطرناک پیمانے پر اور پاکستان کے شدید موسمی واقعات سے بڑھتے ہوئے خطرات سے نمٹنے کے لئے طلب کیا گیا تھا۔

(جاری ہے)

کمیٹی نے مون سون کی تباہ کاریوں، پرانے ڈیزاسٹر رسپانس انفراسٹرکچر اور زیر زمین پانی کی تیزی سے کمی کا سنجیدگی سے نوٹس لیا جو ملک کے پانی کے بحران کو بڑھا رہا ہے۔

سینیٹر شیری رحمان نے کہا کہ 26 جون سے 22 جولائی تک پاکستان میں مون سون کی شدید بارشوں سے 242 جانیں ضائع ہو چکی ہیں جبکہ 598 افراد زخمی ہو چکے ہیں۔انہوں نے کہا کہ صرف گزشتہ 24 گھنٹوں کے دوران 21 افراد ہلاک اور 6 زخمی ہوئے یہ کوئی یکطرفہ سانحہ نہیں ہے، یہ موسمیاتی تبدیلیوں کی رفتار ہے اور پاکستان موسمیاتی خطرات میں پہلے نمبر پر ہے۔ انہوں نے قدرتی آبی گزرگاہوں پر غیر منصوبہ بند تعمیرات کی مذمت کرتے ہوئے سید پور ولیج اور ڈی ایچ اے راولپنڈی کا حوالہ دیا جہاں لاپرواہی کی وجہ سے جانیں ضائع ہوئیں اور انفراسٹرکچر تباہ ہوا، ہم اس کو مزید قدرتی آفت نہیں کہہ سکتے، یہ ہماری ذمہ داری سے چھٹکارا پاتا ہے، یہ انسانوں کی طرف سے پیدا ہونے والی آفات ہیں جو موسمیاتی تبدیلیوں کے تناظر میں ناقص منصوبہ بندی اور بے عملی کی وجہ سے پیدا ہوتی ہیں۔

سینیٹر شیری رحمان نے کہا کہ ڈی ایچ اے راولپنڈی میں بہہ جانے والے باپ بیٹی کی تلاش کے لئے آپریشن جاری ہے۔ انہوں نے کہا کہ گلگت بلتستان میں سیاحتی سرگرمیوں کو محدود کیا جانا چاہئےجہاں ہنگامی حالات جاری ہیں۔ سینیٹر شیری رحمان نے کہا کہ کوئی بھی وزارت کسی بھی پیمانے پر پاکستان کے زیر زمین پانی نکالنے کا نقشہ فراہم نہیں کر سکتی۔ سینیٹ کی قائمہ کمیٹی برائے موسمیاتی تبدیلی کے ایجنڈے میں زیر زمین پانی نکالنا اور پانی کی کمی کا معاملہ تھا۔

پانی کے وسائل کی وزارت بھی فی کس سطحی پانی کی کھپت کے جوابات کے ساتھ جدوجہد کر رہی تھی کہ ہمارے ملک میں زراعت کے لئے کتنے ٹیوب ویل کام کر رہے ہیں، اور کتنے ری چارج ہو رہے ہیں۔ آبپاشی یا عام استعمال کے لئے پیمانے کا نقشہ بنانے کی صلاحیت نہیں ہے۔ سینیٹر شیری رحمان نے کہا کہ ایک ایسے ملک کے لئے جسے اقوام متحدہ نے اس سال پانی کی قلت قرار دیا ہے، پی ایس ڈی پی یا دیگر منصوبہ بندی میں پانی کی ذخیرہ اندوزی کا کوئی ثبوت نہیں ہےخاص طور پر جب ہم طوفانی مون سون سے گزر رہے ہیں، یہ مکمل طور پر بکھرا ہوا اور ناکافی ردعمل ہے۔

انہوں نے مزید نشاندہی کی کہ اقوام متحدہ کے سیکرٹری جنرل کی جانب سے قبل از وقت وارننگ کو بنیادی انسانی حق کے طور پر ماننے کے بار بار مطالبات کے باوجود پاکستان میں قبل از وقت وارننگ کے جدید نظام کا فقدان ہے۔ہم اب بھی وارننگ جاری کرنے کے لئے 1912 کا ماڈل استعمال کر رہے ہیں،باقی دنیا ریئل ٹائم سے چلنے والے سسٹمز استعمال کر رہی ہے۔ حکام نے درخواست کی کہ سینیٹ کمیٹی صوبوں کو ہدایات جاری کرے کہ وہ اپنی قبل از وقت وارننگ کی کوششوں کو تقویت دیں جس پر سینیٹر شیری رحمان نے مکمل تعاون کی یقین دہانی کراتے ہوئے کہا کہ صوبائی اور ضلعی انتظامیہ دونوں کو ہدایات جاری کی جائیں گی۔

انہوں نے کہا کہ زیر زمین پانی کی کمی ایک اور اہم تشویش ہے،صوبوں کو بتایا جائے کہ انہیں کتنے ٹیوب ویل لگانے کی اجازت ہے۔ تعداد میں اس قدر ڈرامائی اضافہ ہوا ہے کہ زیر زمین پانی خطرناک حد تک ختم ہو رہا ہے۔حکام نے کمیٹی کو بتایا کہ پاکستان میں 1975-76 میں 0.16 ملین ٹیوب ویل تھے جو 2017-18 تک بڑھ کر 1.39 ملین ہو گئے ہیں۔اس کے مقابلے میں دیگر جنوبی ایشیائی ممالک میں زیر زمین پانی کی کمی کی نگرانی کے لیے شہر کی سطح کے نظام موجود ہیں۔

ہم اب بھی 2022 کے اعداد و شمار پر انحصار کر رہے ہیں،ہمیں 2025 کے زمینی پانی کی صورتحال کی تازہ کاری کی ضرورت ہے۔ انہوں نے تمام صوبوں کو ہدایت کی کہ وہ آئندہ اجلاس میں زیر زمین پانی کی صورتحال سے متعلق تازہ ترین رپورٹ پیش کریں۔ سینیٹر شیری رحمان نے اس بات پر بھی گہری تشویش کا اظہار کیا کہ بارش کے پانی کو محفوظ کرنے کے لیے کوئی اقدام نہیں کیا جا رہا ہے اور نہ ہی ریچارج ویلز پر کوئی بامعنی کام کیا جا رہا ہے جو کہ موسمیاتی موافقت کے لیے ایک بنیادی آلہ ہے،دنیا اس کو ترجیح دے رہی ہے لیکن یہاں اس پر کام نہیں ہورہا۔

انہوں نے کہا کہ پانی ذخیرہ کرنے کی کوئی موجودہ حیثیت نہیں ہے، ادارے محض بات چیت میں مصروف ہیں جبکہ زمینی حقائق مزید بگڑ رہے ہیں۔ سینیٹر شیری رحمان نے کہا کہ بلوچستان اور چترال میں زمین پہلے ہی بنجر ہو چکی ہے اور صوبوں کو ہر مون سون کے بعد پانی کی شدید قلت کا سامنا کرنا پڑتا ہے۔ سینیٹر شیری رحمان نے ہدایت کی کہ آئندہ اجلاس میں صوبے زمینی پانی کے ریچارج، ٹیوب ویل ریگولیشن اور بارش کے پانی کی ذخیرہ اندوزی کے حوالے سے تازہ ترین اعداد و شمار اور منصوبے سامنے لائیں۔

اجلاس میں سینیٹر بشریٰ انجم بٹ، سینیٹر فلک ناز، سینیٹر سید وقار مہدی اور سینیٹر شہادت اعوان نے شرکت کی۔ اس کے علاوہ وزارت موسمیاتی تبدیلی اور ماحولیاتی رابط، وزارت آبی وسائل اور فیڈرل فلڈ کمیشن کے سینئر حکام بھی اس موقع پر موجود تھے۔