کسٹمز کی کارروائیاں،10سال میں 7 من سے زائد اسمگلڈ سونا ضبط

سب سے زیادہ اسمگلڈ سونا2017-18کے دوران پکڑا گیا، جب 58 کلو سے زائد سونا ضبط کیا گیا اورا سمگلنگ کے 53 کیسز دائر کیے گئے

ہفتہ 26 جولائی 2025 16:11

کراچی(اُردو پوائنٹ اخبارتازہ ترین - این این آئی۔ 26 جولائی2025ء)پاکستان کسٹمز نے کارروائیاں کرتے ہوئے گزشتہ 10 سالوں کے دوران 303 کلو سے زائد اسمگلڈ سونا ضبط کر لیا۔دستاویزات کے مطابق کسٹمز نے 15-2014 سے لے کر 25-2024 تک اسمگلڈ سونا ضبط کیا جس کی مجموعی مقدار 7 من سے زائد ہے۔

(جاری ہے)

سب سے زیادہ اسمگلڈ سونا 2017-18 کے دوران پکڑا گیا، جب 58 کلو سے زائد سونا ضبط کیا گیا اورا سمگلنگ کے 53 کیسز دائر کیے گئے، اس کے بعد 21-2020 میں 48 کلو سے زائد سونا پکڑا گیا جس پر 62 کیسز رجسٹر کیے گئے ہیں۔

دستاویزات میں یہ بھی بتایا گیا کہ گزشتہ دو سال 23-2022 اور 24-2023 کے دوران سب سے کم اسمگلڈ سونا پکڑا گیا جس سے اسمگلنگ میں کمی کا اشارہ ملتا ہے، کسٹمز حکام نے اسمگلنگ کی روک تھام کے لیے مزید سخت اقدامات اٹھانے کا فیصلہ کیا ہے تاکہ غیر قانونی سرگرمیوں پر قابو پایا جا سکے۔