وزیر داخلہ سے چینی سفیر کی ملاقات ،سی پیک کے جاری منصوبوں کی رفتار اور پیشرفت بارے گفتگو

سی پیک کا پہلا مرحلہ کامیابی سے مکمل ہو چکا ہے، اب دوسرا مرحلہ صنعتی تعاون، زراعت، انفارمیشن ٹیکنالوجی اور سماجی ترقی پر مرکوز ہے، احسن اقبال

اتوار 27 جولائی 2025 17:50

اسلام آباد (اُردو پوائنٹ اخبارتازہ ترین - این این آئی۔ 27 جولائی2025ء) وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال سے پاکستان میں چین کے سفیر جیانگ زائیڈونگ نے اسلام آباد میں ملاقات کی۔ اس موقع پر وفاقی وزیر برائے میری ٹائم افئیرز محمد جنید انور چوہدری اور دونوں ممالک کے اعلیٰ حکام بھی موجود تھے۔ملاقات میں چین۔

پاکستان اقتصادی راہداری (CPEC) کے جاری منصوبوں کی رفتار، پیش رفت اور آئندہ جے سی سی کے اجلاس کی تیاریوں پر تبادلہ خیال کیا گیاجس میں اہم فیصلے متوقع ہیں۔وفاقی وزیر احسن اقبال نے کہا کہ سی پیک کا پہلا مرحلہ کامیابی سے مکمل ہو چکا ہے، اب دوسرا مرحلہ صنعتی تعاون، زراعت، انفارمیشن ٹیکنالوجی اور سماجی ترقی پر مرکوز ہے۔

(جاری ہے)

انہوں نے کہا کہ سی پیک علاقائی رابطوں کے فروغ میں اہم کردار ادا کر سکتا ہے جس سے پورے خطے میں معاشی استحکام اور تعاون کو فروغ ملے گا۔

انہوں نے اس عزم کا اظہار کیا کہ حکومت سی پیک منصوبوں کی مکمل سیکیورٹی کو یقینی بنانے کیلئے پرعزم ہے۔وفاقی وزیر نے گوادر کی ترقی اور خصوصی اقتصادی زونز کے قیام کو حکومت کی اولین ترجیح قرار دیتے ہوئے کہا کہ گوادر بندرگاہ کی مکمل صلاحیت سے فائدہ اٹھانے کیلئے مؤثر اقدامات کیے جا رہے ہیں۔ انہوں نے کہا کہ حکومت گوادر کی بندرگاہی تجارتی صلاحیت سے بھرپور فائدہ اٹھانے کے لیے پرعزم ہے۔

احسن اقبال نے کہا کہ گوادر اور گرد و نواح میں معدنی وسائل کے وسیع مواقع موجود ہیں، جن سے جدید انفراسٹرکچر کی مدد سے بھرپور فائدہ اٹھایا جا سکتا ہے۔انہوں نے زراعت کے شعبے میں چین کے ساتھ جاری تعاون پر بھی اطمینان کا اظہار کیا اور کہا کہ چین سے تربیت یافتہ پاکستانی زرعی گریجویٹس موسمیاتی تبدیلی کے اثرات سے نمٹنے میں کلیدی کردار ادا کریں گے۔

پروفیسر احسن اقبال نے پاکستان اسپیس سینٹر کے قیام کو قومی اہمیت کا حامل منصوبہ قرار دیا اور کہا کہ اس منصوبے کو جلد مکمل کرنے کے لئے چین کلیدی کردار ادا کرے گا۔ چینی سفیر جیانگ زیدونگ نے پاکستان کی ترقی میں چین کی مسلسل معاونت کا یقین دلاتے ہوئے کہا کہ دونوں ممالک کے درمیان تعاون آنے والے برسوں میں مزید وسعت اختیار کرے گا۔