ملک میں پائیدار زرعی ترقی اور غذائی تحفظ کو یقینی بنانے کیلئے جامع پالیسی فریم ورک تیار اور نافذ کیاجائے،وفاقی وزیر ڈاکٹر مصدق ملک

پیر 28 جولائی 2025 18:53

اسلام آباد (اُردو پوائنٹ اخبارتازہ ترین - اے پی پی۔ 28 جولائی2025ء) وفاقی وزیر برائے موسمیاتی تبدیلی و ماحولیاتی ہم آہنگی ڈاکٹر مصدق ملک نے ہدایت کی ہے کہ حیاتیاتی تحفظ، بائیو ٹیکنالوجی اور ضابطہ جاتی طریقہ کار پر مشتمل ایک جامع پالیسی فریم ورک 90 دن کے اندر تیار اور نافذ کیا جائے تاکہ ملک میں پائیدار زرعی ترقی اور غذائی تحفظ کو یقینی بنایا جا سکے۔

یہ ہدایت انہوں نے پاکستان میں جینیاتی طور پر ترمیم شدہ (جی ایم او) سویابین میل کی درآمد اور اس سے متعلقہ ضابطہ جاتی فریم ورک کا جائزہ لینے کے لئے اعلیٰ سطحی کمیٹی کے اجلاس کی صدارت کرتے ہوئے دی۔ پیر کو وزارت موسمیاتی تبدیلی و ماحولیاتی ہم آہنگی کی جانب سے جاری بیان کے مطابق اجلاس کے دوران وفاقی وزیر نے اس بات پر زور دیا کہ تمام فیصلے مضبوط سائنسی شواہد کی بنیاد پر کیے جائیں۔

(جاری ہے)

انہوں نے متعلقہ اداروں کو ہدایت دی کہ وہ جامع تجزیہ کریں تاکہ یہ سمجھا جا سکے کہ پاکستان میں سویابین کی پیداوار دیگر ممالک کے مقابلے میں نمایاں طور پر کم کیوں ہے اور یہ بھی معلوم کیا جا سکے کہ مقامی سطح پر تیار کردہ سویابین بیج اور میل کی پیداواری لاگت درآمد شدہ متبادل کے مقابلے میں غیر متناسب طور پر زیادہ کیوں ہے؟۔ اجلاس میں حیاتیاتی تحفظ کے ممکنہ خدشات پر بھی غور کیا گیا جن میں جینیاتی مواد کے اخراج کے خطرات شامل ہیں اور واضح حفاظتی پروٹوکول وضع کرنے کی اہمیت پر زور دیا گیا۔

اجلاس میں پروفیسر کوثر عبداللہ ملک کی سربراہی میں ایک کمیٹی تشکیل دی گئی جو آئندہ دس دنوں میں ماہرین اور محققین کے ساتھ قومی کانفرنس منعقد کرے گی تاکہ بیج اور بائیو ٹیکنالوجی سے متعلق پالیسی سازی کے لیے سائنسی رہنمائی فراہم کی جا سکے۔