بیرسٹرمحمد علی سیف کی سربراہی میں پاکستانی علماء کرام اور سیاستدانوں پر مشتمل وفد کی چینی وزارتِ خارجہ کے اہم ذمہ داران سے ملاقات

پشاور (اُردو پوائنٹ اخبارتازہ ترین - اے پی پی۔ 28 جولائی2025ء) مشیر اطلاعات خیبر خیبر پختون خواہ بیرسٹرمحمد علی سیف کی سربراہی میں پاکستانی علماء کرام، مذہبی سکالرز اور سیاستدانوں پر مشتمل اعلیٰ سطحی وفد چین میں چینی وزارتِ خارجہ کے دفتر گئے اور وہاں پر اہم ذمہ داران سے ملاقات کی۔ اس موقع پر وفد کو ساؤتھ ایشیا ڈیسک کے انچارج کی جانب سے پاکستان-چین دوستی، مشترکہ مفادات اور جاری منصوبوں کے بارے میں تفصیلی بریفنگ دی گئی۔

وزارت خارجہ چین کے ڈپٹی ڈائریکٹر جنرل ژیانگ ماومنگ نے بتایا کہ پاکستان اور چین کی روایتی دوستی باہمی اشتراکِ عمل میں تبدیل ہو چکی ہے۔ان کا کہنا تھا کہ پاکستان اور چین کی دوستی صرف روایتی نہیں بلکہ ایک عملی شراکت داری ہے، جس کا مظہر سی پیک اور دیگر اقتصادی منصوبے ہیں۔

(جاری ہے)

انہوں نے مزیدبتایا کہ سی پیک اب اپنے اگلے مرحلے میں داخل ہو رہا ہے، جس میں پانچ بڑے منصوبے شامل کیے جا رہے ہیں، اور دیگر ہمسایہ ممالک کو بھی اس کا حصہ بنایا جائے گا۔

انہوں نے زور دیا کہ پاک چین تعلقات کو عوامی سطح پر فروغ دینے کی ضرورت ہے۔ علماء کرام، اسکالرز اور سیاستدان معاشرے میں مؤثر کردار ادا کرتے ہیں، اسی لیے اس وفد کی چین آمد کو خصوصی اہمیت دی گئی ہے۔اب صرف سی پیک نہیں بلکہ اس سے آگے کے مزید پانچ مراحل اور دیگر ممالک کے اشتراک پر کام ہو رہا ہے۔ملاقات کے دوران پاکستان کو ایک مضبوط، کامیاب، پُرامن اور ترقی یافتہ ملک کے طور پر دیکھنے کی خواہش کا اظہار کیا۔

بیرسٹر محمد علی سیف نے چینی حکومت، وزارتِ خارجہ اور میزبان اداروں کا شکریہ ادا کیا۔ انہوں نے کہا کہ پاکستان میں چینی شہریوں کی سلامتی کو عوامی سطح پر بھی خاص اہمیت دی جاتی ہے۔ وفد نے پاک بھارت جنگ کے دوران چین کی طرف سے ملنے والے تعاون پر پاکستانی قوم کی جانب سے اظہارِ تشکرکیا۔پاکستانی وفد نے غزہ کے حوالے سے چین کے مثبت کردار کو بھی سراہا اور کہا کہ پاکستان میں عوامی سطح پر اس حوالے سے چین کے لیے محبت پائی جاتی ہے اور لوگ مزید موثر کردار ادا کرنے کے خواہاں ہیں۔

وفد نے پاک افغان تعلقات میں بہتری کے لیے چین کے تعمیری کردار کو بھی قابلِ تحسین قرار دیا۔ملاقات میں قومی وطن پارٹی کے نائب صدر سکندر حیات خان شیرپائونے کہا کہ پاکستان کی مذہبی اور قوم پرست جماعتوں میں چین کے حوالے سے یکساں نیک جذبات پائے جاتے ہیں۔ پاکستانی وفد نے پاک چائنہ تعلقات کو فروغ دینے کے لیے اسرار مدنی اور ان کے ادارے کے کردار کو سراہا-وفد کے رکن مفتی زبیر اشرف عثمانی نے چینی مذہبی رہنماؤں کو پاکستان کے دورے کی دعوت دی اور جامعہ دارالعلوم کراچی اور وفاق المدارس کے دیگر اداروں میں چینی طلبہ کے لیے مفت تعلیم اور مکمل قیام و طعام کی پیشکش کی۔

صوبائی وزیر برائے سماجی بہبود سیدقاسم شاہ نے کہا کہ ان کے والد سید علی شاہ جب پشاور کے میئر تھے اس وقت ارمچی اور پشاور کے مابین تعمیر و ترقی کے حوالے سے یکساں اور مشترکہ اقدامات اٹھانے کا فیصلہ کیا گیا تھا اوراس سلسلے کو وہیں سے دوبارہ جوڑا جائے۔ ڈائریکٹر ادارہ تحقیقات اسلامی ڈاکٹر محمدضیاء الحق نے تمام بڑی جامعات اور شہروں میں پاک چین ثقافتی مراکز کے قیام کی تجویز پیش کی تاکہ دوطرفہ تعلقات کو مزید وسعت دی جا سکے۔

نائب صدر قومی وطن پارٹی سکندر حیات شیرپاؤ نے چائنہ ویزہ کے حصول میں پاکستانی شہریوں کو درپیش مشکلات کا ذکر کرتے ہوئے انہیں مزید بہتر کرنے کیلئے تجاویز دیں۔اس موقع پر وفد کے سربراہ نے وفد کے ممبران کا تعارف کروایا اور ان کے سماجی،سیاسی اور دینی اثر و رسوخ کے حوالے سے آگاہ کیا۔ وفد میں مولانا عبدالقدوس محمدی ترجمان وفاق المدارس،مفتی انور شاہ مہتمم جامعہ احسن العلوم کراچی،مولانا محمد احمد دارالعلوم حقانیہ اکوڑہ خٹک،حاجی محمد ابرار تبلیغی جماعت،اسامہ اجمل چیئرمین پاکستان پیس کونسل،سید شاہ فیصل سربراہ سادات موومنٹ پاکستان بھی شامل تھے-وفد اراکین نے اس عزم کا اظہار کیا کہ ان کا یہ دورہ دونوں ممالک کے درمیان باہمی اعتماد، دوستی اور تعاون کو مزید مستحکم بنانے میں اہم سنگِ میل ثابت ہوگا۔