تعلیمی میدان میں اصلاحات وزیراعلیٰ پنجاب کی ترجیحات ہیں، وفاقی وزیر ریلوئے حنیف عباسی کا تقریب سے خطاب

راولپنڈی (اُردو پوائنٹ اخبارتازہ ترین - اے پی پی۔ 18 ستمبر2025ء) وفاقی وزیر ریلوئے محمد حنیف عباسی نے کہا ہے کہ تعلیمی میدان میں اصلاحات وزیر اعلیٰ پنجاب کی ترجیحات ہیں،میرٹ اور شفافیت کا کریڈٹ وزیر اعلیٰ پنجاب کو جاتا ہے، اللہ کا شکر ہے کہ حرمین کی حفاظت کی ذمہ داری پاکستان کو مل گئی جو بہت بڑا اعزاز ہے، پاکستان اور سعودی عرب کے درمیاں معاہدہ سنگ میل کی حیثیت رکھتا ہے،ملک کا دفاع ناقابل تسخیر ہے، ہماری فوج نے دشمن کو بدترین شکست دی، اپنے سے دس گنا بڑے دشمن کو ہم نے شکست دی،سفارتی محاذ پر کامیابی کا کریڈٹ وزیر اعظم پاکستان میاں محمد شہباز شریف کو جاتا ہے۔

ان خیالات کا اظہار وفاقی وزیر نے جمعرات کو بورڈ آف انٹرمیڈیٹ اینڈ سیکنڈری ایجوکیشن راولپنڈی کے انٹرمیڈیٹ پہلا سالانہ امتحان 2025 میں نمایاں کاکردگی دکھانے والے طلبہ و طالبات میں تقسیم انعامات کی تقریب سے خطاب کرتے ہوئے کیا۔

(جاری ہے)

تقریب میں پارلیمانی سیکرٹری برائے اطلاعات و ثقافت پنجاب شازیہ رضوان،اراکین صوبائی اسمبلی پنجاب ضیا اللہ شاہ، عاصمہ عباسی, رفعت عباسی اور فلک شیر،چیئرمین بورڈ محمد عدنان خان،کنٹرولر امتحانات تنویر اصغراعوان، محکمہ تعلیم، طلبہ وطالبات اور والدین نے بھی تقریب میں خصوصی شرکت کی۔

تقریب سے خطاب کرتے ہوئے وفاقی وزیر ریلوے حنیف عباسی نے پوزیشن ہولڈرز طلبہ وطالبات کو میڈلز اور انعامات سے نوازا۔تقریب سے خطاب کرتے ہوئے وفاقی وزیر ریلوے حنیف عباسی نے کہا کہ تمام کامیاب اور پوزیشن ہولڈرز طلبہ و طالبات اور انکے والدین کو مبارکباد پیش کرتا ہوں۔ وزیر اعلی پنجاب مریم نواز شریف نے طلبہ وطالبات کو لیپ ٹاپ، ہونہار سکالرشپ دی۔

وفاقی وزیر نے کہا کہ شفافیت کی بنیاد پر نتائج کا انعقاد یقینی بنایا گیا ہے۔ چیئرمین بورڈ عدنان خان اور انکی ٹیم کو شفافیت اور میرٹ کے معیار کو قائم کرنے پر خراج تحسین پیش کرتا ہوں۔صوبائی وزیر تعلیم پنجاب سکندر حیات تعلیمی نظام میں جدت لانے کے لیے متحرک ہیں جو قابل ستائش ہے۔ راولپنڈی کے کالجز اور سکولوں میں ترقیاتی کاموں کا سلسلہ جاری ہے۔

ہماری لیڈر شپ نے ملکی ترقی کے لیے گراں قدر خدمات دی ہیں اور دے رہی ہے۔تقریب میں بتایا گیا کہ مجموعی طور پر انٹرمیڈیٹ پہلا سالانہ امتحان 2025 کا رزلٹ 54.12 فیصد رہا۔ کامیاب مرد طلبہ کی کامیابی کی شرح 39.87 جبکہ طالبات کی کامیابی کی شرح 62.4 رہی۔تینوں مجموعی پوزیشنز ہونہار طالبات نے اپنے نام کر لیں۔ پہلی پوزیشن پنجاب کالج برائے خواتین تلہ گنگ کی اریج شفقت حیات نے حاصل کی جنہوں نے 1200 میں سے 1148 نمبر حاصل کیے۔ اسی کالج کی عائشہ مشتاق نے 1139 نمبر لے کر دوسری پوزیشن اپنے نام کی جبکہ رائل کالج آف سائنسز فار گرلز چکوال کی ایمان فاطمہ نے 1138 نمبر لے کر تیسری پوزیشن حاصل کی۔نمایاں پوزیشنز حاصل کرنے والے طلبہ و طالبات کو گارڈ آف آنر پیش کیا گیا۔