امسال 48لاکھ 76ہزار سے زائد افراد کو ڈرائیونگ لائسنس جاری کیے گئے، ترجمان پنجاب پولیس

پیر 28 جولائی 2025 21:40

لاہور (اُردو پوائنٹ اخبارتازہ ترین - اے پی پی۔ 28 جولائی2025ء) پنجاب پولیس پبلک سروس ڈلیوری اور ٹریفک قوانین پر عملدرآمد یقینی بنانے کیلئے مصروف عمل ہے جس کے تسلسل میں رواں سال کے دوران 48لاکھ 76ہزار سے زائد افراد کو ڈرائیونگ لائسنس جاری کیے گئے۔ ترجمان پنجاب پولیس نے بتایاکہ ٹریفک قوانین کی خلاف ورزی پر 73لاکھ سے زائد چالان اور 4ارب 52کروڑ روپے سے زائد جرمانے عائد کیے گئے۔

(جاری ہے)

دھواں چھوڑنے والی 2 لاکھ 50ہزار گاڑیوں کے چالان، 22ہزار 276کو تھانوں میں بند کیا گیا جبکہ 214کے فٹنس سرٹیفکیٹ ضبط کیے گئے۔ آئی جی پنجاب نے کہا کہ ٹریفک قوانین کی خلاف ورزی کرنے والوں کے خلاف کارروائیاں جاری رکھی جائیں۔اوور لوڈنگ، اوور سپیڈنگ، کم عمر ڈرائیورز اور ون وے کی خلاف ورزی کرنے والوں کے خلاف کریک ڈاؤن میں تیزی لائی جائے۔انہوں نے کہا کہ پنجاب پولیس کے 127ڈرائیونگ ٹریننگ سکولز میں شہریوں کو ٹریننگ بھی دی جارہی ہے۔انہوں نے مزید کہا کہ ٹریفک چالانوں کے نادہندگان سے ریکوری کیلئے موثر اقدامات کیے جائیں۔