آر ڈی ایف سی بلڈنگ میں آتشزدگی ، کوئی نقصان نہیں پہنچا

جمعرات 31 جولائی 2025 01:30

اسلام آباد (اُردو پوائنٹ اخبارتازہ ترین - اے پی پی۔ 31 جولائی2025ء) فیڈرل بورڈ آف ریونیو میں واقع آر ڈی ایف سی بلڈنگ میں آگ لگ گئی ، جہاں کارپوریٹ ٹیکس آفس سمیت ایف بی آر کے متعدد دفاتر قائم ہیں ۔آگ لگنے کی اطلاع ملتے ہی فائر بریگیڈ کا عملہ موقع پر پہنچ گیا ۔ اس کے ساتھ ساتھ عمارت میں موجود تمام افراد کی حفاظت کو یقینی بنانے کے لیے انہیں فوری طور پر نکالا گیا۔

ایف بی آر ہیڈکوارٹرز کے افسران بھی بلا تاخیر جائے وقوعہ پر پہنچے۔اس موقع پر عمارت میں پھنسے چند افراد کو بھی کامیابی سے باہر نکالا گیا۔آگ اسی کمرے تک محدود رہی جہاں یہ لگی تھی اور خوش قسمتی سے ایف بی آر کے ریکارڈز یا دیگر اثاثہ جات کو کوئی نقصان نہیں پہنچا۔ فائر بریگیڈ اور ایف بی آر کے افسران کی بروقت اور موثر کارروائی نے نہ صرف آگ کو محدود رکھنے میں مدد دی بلکہ عمارت میں موجود ایف بی آر ملازمین اور دیگر افراد کو بحفاطت نکالنے میں بھی کلیدی کردار ادا کیا۔

(جاری ہے)

کارپوریٹ ٹیکس آفس اسلام آباد کو عارضی طور پر ریجنل ٹیکس آفس اسلام آباد کی عمارت میں منتقل کر دیا گیا ہے، متعلقہ حکام کی طرف سے متاثرہ عمارت کو حفاظتی تقاضوں کے مطابق کلیئر کرنے تک اس متبادل جگہ پر کام جاری رکھا جائے گا۔ ریکارڈ کی حفاظت کو یقینی بنانے کے لیے سیکورٹی اہلکار بھی متاثرہ عمارت میں تعینات کر دیے گئے ہیں۔فیڈرل بورڈ آف ریونیو نے فائر بریگیڈ اور ایف بی آر کے افسران کی طرف سے فوری طور پر کارروائی کرنے پر انہیں سراہا ہے جس کے نتیجہ میں عمارت میں موجود تمام افراد کو بحفاظت نکال لیا گیا ۔

Facebook Twitter Google + Share on Whatsapp

آر ڈی ایف سی بلڈنگ میں آتشزدگی ، کوئی نقصان نہیں پہنچا

متعلقہ عنوان :

مزید قومی خبریں