بھارت خود کو ذمہ دارعالمی طاقت کے طور پر پیش کرنے میں ناکام رہا، امریکی وزیرخزانہ

جمعہ 1 اگست 2025 22:01

واشنگٹن (اُردو پوائنٹ اخبارتازہ ترین - این این آئی۔ 01 اگست2025ء) امریکی صدر ڈونلڈ ٹرمپ کی انتظامیہ نے روس سے تیل کی خریداری کے معاملے پر بھارت پر شدید مایوسی کا اظہار کرتے ہوئے کہاہے کہ بھارت خود کو ایک ذمہ دارعالمی طاقت کے طور پر پیش کرنے میں ناکام رہا۔کشمیرمیڈیاسروس کے مطابق امریکی وزیر خزانہ اسکاٹ بیسینٹ نے ایک انٹرویو میں کہا ہے کہ بھارت روس سے خام تیل خرید کر اسے ریفائن کرکے فروخت کرتا ہے، جو عالمی برادری کی توقعات کے برعکس ہے۔

انہوں نے کہا کہ بھارت خود کو ایک ذمہ دار عالمی طاقت کے طور پر پیش کرنے میں ناکام رہا ہے۔ ٹرمپ انتظامیہ کے مطابق، بھارت کے رویے نے امریکا کے ساتھ اس کے تجارتی تعلقات کو غیر یقینی بنادیا ہے۔امریکی وزیر خزانہ نے مزید کہا کہ امریکی صدر ڈونلڈ ٹرمپ اور انکی پوری ٹیم بھارت کے موجودہ فیصلوں سے سخت مایوس ہے۔

(جاری ہے)

مستقبل میں تجارتی معاہدے کا انحصار بھارت کے رویے پر ہوگا۔

یاد رہے کہ امریکی صدر ٹرمپ نے 14جولائی کو روس سے تیل خریدنے والے ممالک کو خبردار کیا تھا کہ ان پر 100فیصد ٹیرف عائد کیا جائے گا، جس کے بعد بھارت کی سرکاری آئل ریفائنریز نے روسی تیل کی خریداری عارضی طور پر روک دی تھی۔اطلاعات کے مطابق بھارت دنیا کا تیسرا بڑا تیل درآمد کرنے والا ملک ہے اور روسی سمندری خام تیل کا سب سے بڑا خریدار بھی ہے۔