انتشاری ٹولے پی ٹی آئی سے ملک کیلئے کسی خیر کی توقع نہیں کی جا سکتی‘شہزاد نذیر سندھو

لوگوں کو زبردستی اداروں کے خلاف اکسانا ،حملے کروانا ناقابلِ برداشت ہے‘ مسلم لیگی رہنما

اتوار 3 اگست 2025 11:15

رائے ونڈ(اُردو پوائنٹ اخبارتازہ ترین - این این آئی۔ 03 اگست2025ء)چیئرمین پنجاب ٹرانسپورٹ کمپنی و مسلم لیگی رہنما چودھری شہزاد نذیر سندھو نے کہا ہے کہ انتشاری ٹولے پی ٹی آئی سے ملک کے لئے کسی خیر کی توقع نہیں کی جا سکتی،لوگوں کو زبردستی اداروں کے خلاف اکسانا اور حملے کروانا ناقابلِ برداشت ہے، کسی سیاسی جماعت کے نام پر ایسی دہشت گردی کو ہمیشہ کے لیے بند ہونا چاہیے۔

انہوں نے اپنے بیان میں کہاکہ 9 مئی کے عدالتی فیصلے ملک و قوم کے لیے خوش آئند ہیں،یہ فیصلے ریاستی اداروں کے خلاف منفی سوچ رکھنے والوں کے لیے واضح پیغام ہے کہ ایسی حرکات اب برداشت نہیں کی جائیں گی،ایسے فیصلے نہ صرف قانون کی بالادستی کو یقینی بناتے ہیں بلکہ عوام کے اعتماد کو بھی بحال کرتے ہیں۔

(جاری ہے)

چودھری شہزاد نذیر سندھو نے کہا کہ وزیر اعظم شہباز شریف نے دن رات محنت اور کامیاب سفارتکاری سے پاکستان کا نام فیٹف کی گرے لسٹ سے نکلوایا، جس کے بعد پاکستا ن کی مغربی منڈیوں تک رسائی اور یورپی یونین سے راہیں ہموار ہوئیں۔

انہوں نے کہا کہ تحریک انصاف کے لوگوں نے پاکستان کو دیوالیہ کرانے کے لئے ہر حربہ استعمال کیا، اس جماعت نے آئی ایم ایف ہیڈ کوارٹر کے باہر بھی احتجاج کیا،آئی ایم ایف کو خط لکھے، اس جماعت سے ملک کیلئے کسی خیر کی توقع نہیں کی جا سکتی۔