دوسرا ٹی ٹوئنٹی‘ ویسٹ انڈیز نے پاکستان کو شکست دے دی‘سیریز برابر

ویسٹ انڈیز کی جیت میں گوڈاکیش موتی کے 28، شائی ہوپ کے 21 اور جیسن ہولڈر کے 16 رنز نے نمایاں کردار ادا کیا

اتوار 3 اگست 2025 11:50

فلوریڈا(اُردو پوائنٹ اخبارتازہ ترین - این این آئی۔ 03 اگست2025ء)دوسرے ٹی ٹوئنٹی میچ میں ویسٹ انڈیز نے پاکستان کو 2 وکٹ سے شکست دے دی اور جیت کے لیے دیا گیا 134 رنز کا ہدف حاصل کرلیا۔ویسٹ انڈیز کی جیت میں گوڈاکیش موتی کے 28، شائی ہوپ کے 21 اور جیسن ہولڈر کے 16 رنز نے نمایاں کردار ادا کیا۔قبل ازیں امریکی ریاست فلوریڈا کے شہر لاؤڈرہل میں کھیلے گئے دوسرے میچ میں پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 9 وکٹوں کے نقصان پر 133 رنز بنائے تھے۔

(جاری ہے)

پاکستان کی جانب سے حسن نواز 40 رنز بناکر نمایاں رہے، کپتان سلمان آغا نے 38 اور فخر زمان نے 20 رنز کی اننگ کھیلی۔قومی ٹیم کے دیگر بیٹر کوئی خاطر خواہ کارکردگی نہیں دکھا سکے، صائم ایوب 7، صاحبزادہ فرحان 3، محمد حارث 4، حسن علی 8 اور محمد نواز 2 رنز بناکر آؤٹ ہوئے۔شاہین شاہ آفریدی 2 اور سفیان مقیم نے 1 رن اسکور کیا جبکہ فہیم اشرف بغیر کسی رن کے آؤٹ ہوگئے۔ویسٹ انڈیز کی جانب سے جیسن ہولڈر نے 4 اوورز میں 19 رنز دے کر 4 وکٹ حاصل کیے۔قومی ٹیم میں حارث رؤف کی جگہ حسن علی کو شامل کیا گیا تھا جبکہ ویسٹ انڈیز کی ٹیم میں بھی دو تبدیلیاں کی گئی تھیں۔واضح رہے کہ پہلے ٹی ٹوئنٹی میچ میں پاکستان نے ویسٹ انڈیز کو 14 رنز سے شکست دی تھی۔