ایف آئی اے کراچی زون کی حوالہ ہنڈی میں ملوث منظم گینگ کے خلاف کریک ڈائون،2ملزمان گرفتار،نشاندہی پر کروڑوں مالیت کی ملکی وغیر ملکی کرنسی برآمد

اتوار 3 اگست 2025 14:10

کراچی(اُردو پوائنٹ اخبارتازہ ترین - این این آئی۔ 03 اگست2025ء)ایف آئی اے کراچی زون نے حوالہ ہنڈی میں ملوث منظم گینگ کے خلاف کریک ڈائون کرتے ہوئے کورنگی سے منظم گینگ کے 2 ملزمان کو گرفتار کر لیا ،ملزمان کی نشاندہی پر کروڑوں مالیت کی ملکی وغیر ملکی کرنسی برآمدہوئی ہے۔تفصیلات کے مطابق کارپوریٹ کرائم سرکل کراچی نے کورنگی سے منظم گینگ کے 2 ملزمان کو گرفتار کر لیا۔

ملزمان کی نشاندہی پر کروڑوں مالیت کی ملکی وغیر ملکی کرنسی برآمدہوئی ہے،ملزمان کے خلاف کاروائی خفیہ اطلاع پر کی گئی۔ایف آئی اے حکام کے مطابق ملزمان کورنگی انڈسٹریل ایریا سے حوالہ ہنڈی کی رقم وصول کر رہے تھے۔ملزمان حوالہ ہنڈی رقوم کی ترسیل کے لئے موٹر سائیکل کا استعمال کرتے تھے۔گرفتار ملزم محمد جنید اور وسیم سے 8 لاکھ روپے برآمد کر لئے گئے۔

(جاری ہے)

ترجمان ایف آئی اے کے مطابق گرفتار ملزمان کی نشاندہی پر سعیمہ لگژری ہومز میں ایف آئی اے کی جانب سے کارروائی کے دوران گھر سے بڑی مقدار میں پاکستانی و غیر ملکی کرنسی، لیجرز اور شواہد برآمدہوئے ہیں۔برآمد ہونے والی کرنسی میں 99 لاکھ روپے، 13,500 پائونڈ، 6,300 امریکی ڈالر،14,500 سعودی ریال، 10900 یو اے ای درہم، 1150 یورو اور 8000 تھائی بھات شامل ہیں۔ایف آئی اے حکام کے مطابق ملزمان کے قبضے سے 23 لاکھ روپے مالیت کے ڈیفنس سیونگ سرٹیفکیٹس بھی برآمد ہوئے ہیں۔ملزمان کے خلاف مقدمہ درج کرکے تحقیقات کاآغاز کردیاگیاہے جبکہ دیگر ملزمان کی گرفتاری کے لئے چھاپے مارے جا رہے ہیں۔