جموں و کشمیر کمیونٹی انٹرنیشنل اور کل جماعتی حریت کانفرنس حق خودارادیت کے حصول کے لیے جدوجہد جاری رکھنے کے لئے پر عزم

اتوار 3 اگست 2025 15:10

اسلام آباد (اُردو پوائنٹ اخبارتازہ ترین - اے پی پی۔ 03 اگست2025ء) جموں و کشمیر کمیونٹی انٹرنیشنل(جے کے سی آئی)اور کل جماعتی حریت کانفرنس کی آزادکشمیر شاخ کی اعلیٰ قیادت نے کشمیریوں کے حق خودارادیت کے حصول کے لیے مل کر جدوجہد جاری رکھنے کے عزم کا اعادہ کیاہے۔کشمیرمیڈیاسروس کے مطابق جے کے سی آئی کے چیئرمین غلام نبی بٹ کی قیادت میں ایک اعلیٰ سطحی وفد نے کل جماعتی حریت کانفرنس کی آزادکشمیر شاخ کے کنوینر غلام محمد صفی سے حریت دفتر میں ایک اہم ملاقات کی جس میں انہوں نے مقبوضہ جموں و کشمیر کی موجودہ سیاسی اور انسانی حقوق کی صورتحال پر تفصیلی تبادلہ خیال کیا۔

جے کے سی آئی کے وفد میں جنرل سیکرٹری راجہ پرویز خان، وائس چیئرمین لال حسین راجپوت، سیکرٹری فنانس چوہدری شکیل، سیکرٹری پبلیکیشن سید یوسف ہمدانی اور ایگزیکٹو ممبران سردار صدیق خان، پروفیسر خواجہ فاروق احمد اور راجہ امجد یونس شامل تھے۔

(جاری ہے)

کنوینر غلام محمد صفی نے وفد کا پرتپاک خیرمقدم کرتے ہوئے کہا کہ حریت کانفرنس حصول حق خودارادیت کی غرض سے جدوجہد کے لئے کشمیری عوام کا نمائندہ پلیٹ فارم ہے جس کا وعدہ اقوام متحدہ کی قراردادوں اوربھارت کے پہلے وزیر اعظم پنڈت جواہر لعل نہرو نے کیا ہے۔

انہوں نے کہاکہ حریت کانفرنس سہ فریقی مذاکرات کی مکمل حمایت کرتی ہے جس میں بھارت اور پاکستان کے ساتھ ساتھ کشمیری قیادت بھی شامل ہو۔غلام محمد صفی نے کہا کہ کشمیری عوام کو سیاسی اور سفارتی جدوجہد کے ساتھ ساتھ بین الاقوامی قوانین کے تحت غیر قانونی بھارتی قبضے کے خلاف مسلح مزاحمت کا حق بھی حاصل ہے۔سینئر حریت رہنمائوں محمد فاروق رحمانی، ایڈوکیٹ پرویز احمد اور مشتاق احمد بٹ جو وفد کا حصہ تھے، نے مسئلہ کشمیر کو اجاگر کرنے کے لیے وفد کی کوششوں کو سراہتے ہوئے کہا کہ ہم اگست کے مہینے میں عالمی سطح پر احتجاجی مظاہرے منعقد کرنے جارہے ہیں اور جموں و کشمیر کمیونٹی انٹرنیشنل سے بھرپور شرکت اور تعاون کی درخواست کرتے ہیں۔

جموں و کشمیر کمیونٹی انٹرنیشنل کے وفد نے کہا کہ ہم کل جماعتی حریت کانفرنس کے ساتھ کھڑے ہیں اور اس کی تمام سرگرمیوں میں بڑھ چڑھ کر حصہ لیں گے۔