لوئردیر ،دہشت گردوں کا پولیس چوکی پر بڑا حملہ، اہلکار شدید زخمی

پولیس کی بھرپور جوابی کارروائی سے دہشت گرد فرار ، علاقے میں سرچ آپریشن شروع

پیر 4 اگست 2025 22:05

لوئر دیر (اُردو پوائنٹ اخبارتازہ ترین - این این آئی۔ 04 اگست2025ء)لوئردیر میں دہشت گردوں نے پولیس چوکی پر حملہ کردیا جس کے نتیجے میں ایک اہلکار شدید زخمی ہوگیا جبکہ دہشت گرد جوابی کارروائی پر فرار ہونے میں کامیاب ہوگئے۔

(جاری ہے)

پولیس حکام کے مطابق لوئر دیر کے علاقے میدان گل میں قائم پولیس چوکی پر دہشت گردوں کی جانب سے ہینڈ گرینیڈ اور بھاری ہتھیاروں سے اچانک حملہ کیا گیا، جس کے نتیجے میں ایلیٹ فورس کا ایک اہلکار شدید زخمی ہوگیا، جسے فوری طور پر ڈسٹرکٹ ہیڈ کوارٹر اسپتال تیمرگرہ منتقل کر دیا گیا، جہاں اس کی حالت تشویشناک بتائی جا رہی ہے۔

واقعے کے فورا بعد پولیس نے بھرپور جوابی کارروائی کی، جس کے باعث دہشت گرد فرار ہونے پر مجبور ہوگئے۔ حملے کے بعد پولیس کی مزید نفری جائے وقوع پر پہنچ گئی اور علاقے میں سرچ آپریشن کا آغاز کر دیا گیا ہے۔حکام کے مطابق سکیورٹی فورسز مکمل الرٹ ہیں اور حملہ آوروں کی تلاش کیلئے آپریشن جاری ہے۔ واقعے کے بعد علاقے میں خوف و ہراس پھیل گیا، جب کہ سکیورٹی اداروں نے حساس مقامات پر نگرانی مزید سخت کر دی ہے۔