پاکستان وزیرِاعظم شہباز شریف کے وژن کے مطابق کشمیری عوام کے ساتھ مکمل یکجہتی کا اظہار کرتا ہے، وفاقی وزیرپیر سید عمران احمد شاہ

منگل 5 اگست 2025 17:27

ساہیوال (اُردو پوائنٹ اخبارتازہ ترین - اے پی پی۔ 05 اگست2025ء) وفاقی وزیر برائے تخفیف غربت و سماجی تحفظ پیر سید عمران احمد شاہ نے یومِ استحصال کشمیر کے موقع پر کہا ہے کہ پاکستان وزیرِاعظم شہباز شریف کے وژن کے مطابق کشمیری عوام کے ساتھ مکمل یکجہتی کا اظہار کرتا ہے۔انہوں نے کہا کہ 5 اگست 2019 کو بھارت کی جانب سے کیے گئے اقدامات نہ صرف غیرقانونی ہیں بلکہ اقوامِ متحدہ کی قراردادوں کی بھی صریح خلاف ورزی ہیں۔

بھارت نے جموں و کشمیر کی خصوصی آئینی حیثیت چھین کر وہاں انسانی حقوق کو بری طرح پامال کیا۔

(جاری ہے)

وفاقی وزیر نے کہا کہ اقوامِ متحدہ اور دیگر عالمی اداروں کو چاہیے کہ وہ کشمیریوں کے حقِ خود ارادیت کے لیے آواز اٹھائیں۔ انہوں نے اس بات پر زور دیا کہ کشمیری عوام کی پرامن جدوجہد کو طاقت کے زور پر دبانے کی ہر کوشش ناکام ہوگی۔پیر سید عمران احمد شاہ نے کہا کہ کشمیری عوام اپنے بنیادی انسانی، سیاسی اور جمہوری حق کے حصول کی جدوجہد سے کبھی پیچھے نہیں ہٹیں گے۔ انہوں نے مطالبہ کیا کہ اقوامِ متحدہ کے اداروں اور آزاد میڈیا کو مقبوضہ کشمیر میں جانے کی اجازت دی جائے تاکہ دنیا کو وہاں کی اصل صورتحال سے آگاہی حاصل ہو۔\378