اقوام متحدہ کی قراردادوں کے مطابق کشمیریوں کو ان کا حق خودارادیت ملنا چاہیے ،پارلیمانی سیکرٹری برائے اطلاعات و نشریات بیرسٹر دانیال چوہدری

راولپنڈی (اُردو پوائنٹ اخبارتازہ ترین - اے پی پی۔ 05 اگست2025ء) پارلیمانی سیکرٹری برائے اطلاعات و نشریات بیرسٹر دانیال چوہدری نے کہا ہے کہ 5 اگست کشمیر کی تاریخ کا سیاہ ترین دن ہے جب بھارت نے جموں و کشمیر کی خصوصی آئینی حیثیت ختم کر کے نہ صرف کشمیریوں کے حقوق سلب کیے بلکہ ظلم و جبر کا نیا سلسلہ بھی شروع کیا۔ پاکستان کی حکومت، عوام اور تمام ادارے کشمیری بھائیوں کے ساتھ مکمل یکجہتی کے ساتھ کھڑے ہیں اور ان کی سیاسی، سفارتی اور اخلاقی حمایت جاری رکھیں گے۔

پوری قوم آج کشمیری عوام سے یکجہتی کے اظہار کے طور پر یوم استحصالِ کشمیر منا رہی ہے لیکن ایک مخصوص ٹولہ پاکستان کے خلاف سازش کے تحت یوم استحصال پاکستان منانے کی مذموم کوشش کر رہا ہے۔ ایسے فتنہ انگیز عناصر ملک دشمن ایجنڈے پر کام کر رہے ہیں جن کا مقصد ریاستی اداروں کو کمزور کرنا اور نوجوان نسل کو گمراہ کرنا ہے۔

(جاری ہے)

ان خیالات کا اظہار انہوں نے وقار النساء کالج راولپنڈی میں یوم استحصال کشمیر کے حوالے سے منعقدہ ایک پروقار تقریب سے خطاب کرتے ہوئے کیا۔

تقریب میں رکن قومی اسمبلی طاہرہ اورنگزیب، کمشنر راولپنڈی ڈویژن انجینئر عامر خٹک، حریت رہنما طفیل الطاف، ڈائریکٹر کالجز امجد خٹک، سی ای او ایجوکیشن طارق محمود، پرنسپل وقار النساء کالج، اساتذہ، طالبات، سول سوسائٹی اور مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔ بیرسٹر دانیال چوہدری نے کہا کہ پاکستان کا ہر شہری اپنے کشمیری بہن بھائیوں کے ساتھ سیسہ پلائی دیوار بن کر کھڑا ہے اور کشمیریوں کو اقوام متحدہ کی قراردادوں کے مطابق حق خودارادیت ملنا چاہیے۔

انہوں نے بھارت کی جانب سے کشمیری طالبات کے تعلیمی ادارے بند کرنے کو غیر انسانی اور جابرانہ اقدام قرار دیتے ہوئے کہا کہ کشمیری عوام اپنے حق خودارادیت کی جدوجہد میں ثابت قدم ہیں۔ آج پوری قوم کشمیری عوام سے یکجہتی کے طور پر یوم استحصال کشمیر منا رہی ہے لیکن بدقسمتی سے کچھ عناصر پاکستان مخالف ایجنڈے پر عمل کرتے ہوئے "یومِ استحصال پاکستان" منانے کی سازش میں مصروف ہیں جو سراسر ملک دشمنی ہے۔

ان کا کہنا تھا کہ بھارت کشمیریوں کے جذبہ آزادی کو کبھی نہیں دبا سکتا۔ اقوام متحدہ کی قراردادوں کے مطابق کشمیریوں کو ان کا حق خودارادیت ملنا چاہیے اور پاکستان ہر بین الاقوامی فورم پر کشمیریوں کی آواز بن کر ان کا مقدمہ لڑتا رہے گا۔ پاکستان کی موجودہ صورتحال پر بات کرتے ہوئے انہوں نے کہا کہ ایک مخصوص ٹولے نے یہ بیانیہ بنایا کہ ملک ڈیفالٹ ہو رہا ہے، دیوالیہ ہونے جا رہا ہے، اور آئی ایم ایف اسے تالے لگا دے گا لیکن آج ڈیڑھ سے دو سال کے عرصے کے بعد ہم اپنے قدموں پر کھڑے ہیں۔

دانیال چوہدری نے قوم کے اتحاد، افواج پاکستان کی قربانیوں اور نوجوان نسل کے عزم کو سراہتے ہوئے کہا کہ ہم نے نفرت کے بجائے ترقی کا راستہ اپنایا ہے۔ پارلیمانی سیکرٹری نے طالبات پر زور دیا کہ وہ کشمیر پر تحقیقی مقالے (ریسرچ پیپرز) لکھیں اور عالمی سطح پر کشمیری عوام کے حق میں آگاہی پیدا کریں۔ انہوں نے نوجوان نسل سے اپیل کی کہ وہ سوشل میڈیا پر کشمیر کی آواز بنیں اور بھارتی مظالم کو دنیا کے سامنے لائیں۔ تقریب کا اختتام ’’پاکستان زندہ باد‘‘ کے فلک شگاف نعروں سے ہوا، جس نے دنیا کو یہ پیغام دیا کہ پاکستانی قوم کشمیریوں کے ساتھ ہر محاذ پر کھڑی ہے اور ان کے حق کی جنگ میں ان کا بھرپور ساتھ دے گی۔