ہارون اختر خان سے عالمی ماہر اقتصادیات پروفیسر نک لی کی ملاقات ، نئی قومی صنعتی پالیسی اور برآمدات میں اضافہ پر تفصیلی تبادلہ خیال

منگل 5 اگست 2025 18:23

اسلام آباد (اُردو پوائنٹ اخبارتازہ ترین - اے پی پی۔ 05 اگست2025ء) وزیراعظم کے معاون خصوصی برائے صنعت و پیداوار ہارون اختر خان سے معروف عالمی ماہر اقتصادیات پروفیسر نک لی نے منگل کوملاقات کی۔ملاقات میں نئی قومی صنعتی پالیسی، بیمار صنعتی یونٹس کی بحالی اور برآمدات میں اضافہ کے لیے ممکنہ اقدامات پر تفصیلی تبادلہ خیال کیا گیا۔ہارون اختر خان نے بتایا کہ صنعتی پالیسی کے نفاذ کے لیے تجاویز کا مرحلہ جاری ہے اور تمام سٹیک ہولڈرز کے ساتھ مشاورت کے لیے ذیلی کمیٹیاں قائم کی جا چکی ہیں۔

انہوں نے مزید کہا کہ وزیراعظم شہباز شریف کی ہدایت پر تمام متعلقہ فریقین سے مشاورت کا عمل جاری ہے اور پالیسی کے نفاذ کے لیے قانونی ترامیم، بیمار یونٹس کی بحالی اور سرمایہ کاری کو آسان بنانے کے لیے واضح روڈ میپ تشکیل دیا جا رہا ہے،صنعتی پالیسی کے نفاذ کے لیے ذیلی کمیٹیاں تشکیل دے دی گئی ہیں۔

(جاری ہے)

قانونی اصلاحات، بیمار صنعتی یونٹس کی بحالی اور سرمایہ کار دوست ماحول ترجیحات میں شامل ہیں،سرکاری اداروں کی جانب سے سرمایہ کاروں کو ہراساں کیے جانے کے خاتمے کو پالیسی کا بنیادی مقصد قرار دیا گیا،پاکستان انڈسٹریل ڈویلپمنٹ کارپوریشن کی استعداد کار میں اضافے کو ناگزیر قرار دیا گیا۔

ہارون اختر خان نے اس بات پر زور دیا کہ صنعتی ترقی کے لیے سٹارٹ اپس کو فروغ دینا، ٹیکنالوجی کو اپنانا اور برآمد کنندگان کو مراعات دینا ناگزیر ہے۔پروفیسر نک لی نے پاکستان کی نئی صنعتی پالیسی کے وژن کو سراہتے ہوئے کہا کہ پالیسی کے موثر نفاذ کے لیے ادارہ جاتی کیپیسٹی بلڈنگ اور اجتماعی کوششیں ناگزیر ہیں۔انہوں نے وزیراعظم شہباز شریف اور معاون خصوصی ہارون اختر خان کی قیادت میں جاری صنعتی اصلاحات کو ایک مثبت پیش رفت قرار دیا۔