ترکیہ کے سرکاری دورے کے دوران چیف آف دی نیول اسٹاف کو ترک مسلح افواج کا لیجن آف میرٹ ایوارڈ دیا گیا

کراچی (اُردو پوائنٹ اخبارتازہ ترین - این این آئی۔ 05 اگست2025ء)چیف آف دی نیول اسٹاف ایڈمرل نوید اشرف نے ترکیہ کا سرکاری دورہ کیا، جہاں انہیں ترک مسلح افواج کی جانب سے اعلی عسکری اعزاز لیجن آف میرٹ سے نوازا گیا۔ یہ اعزاز ترک بحریہ کے کمانڈر ایڈمرل ارجمینت تطلی اوغلو نے پیش کیا، جو دونوں ممالک کے درمیان دفاعی تعلقات اور بحری تعاون کو فروغ دینے میں ایڈمرل نوید اشرف کی خدمات کا اعتراف ہے۔

ترک بحریہ کے ہیڈکوارٹر آمد پر ایڈمرل نوید اشرف کو گارڈ آف آنر پیش کیا گیا۔ بعد ازاں، انہوں نے کمانڈر ترک نیوی ایڈمرل ارجمینت تطلی اوغلو سے ملاقات کی۔ ملاقات میں دونوں ممالک کی بحری افواج کے درمیان پیشہ ورانہ تعاون اور باہمی دلچسپی کے امور پر تبادلہ خیال کیا گیا۔دورے کے دوران، چیف آف دی نیول اسٹاف نے ترک وزیر دفاع یاسر گولر، چیف آف جنرل اسٹاف جنرل متین گورک، اور کمانڈر ترک نیوی فلیٹ ایڈمرل قادر یلدز سے بھی ملاقاتیں کیں۔

(جاری ہے)

ان ملاقاتوں میں علاقائی میری ٹائم سیکیورٹی اور دفاعی تعاون کے فروغ پر بات چیت کی گئی۔ ایڈمرل نوید اشرف نے دونوں ممالک کی مسلح افواج کے درمیان مشترکہ مشقوں، باہمی دوروں اور تربیتی و تبادلہ پروگراموں کے ذریعے روابط بڑھانے پر زور دیا۔بعد ازاں، چیف آف دی نیول اسٹاف نے استنبول نیول شپ یارڈ کا دورہ کیا، جہاں انہیں پاکستان نیوی کے ملجم پراجیکٹ کے بارے میں تفصیلی بریفنگ دی گئی جو دونوں ممالک کے درمیان دفاعی تعاون کی ایک اہم مثال ہے۔

انہوں نے گولچک نیول بیس کا بھی دورہ کیا، جہاں انہیں آبدوزوں کے جدید ڈیزائن اور تعمیراتی صلاحیتوں سے آگاہ کیا گیا۔چیف آف دی نیول اسٹاف نے ترک نیوی کے جنگی جہاز TCG ORUCREIS اور آبدوز S/M PIRIREIS کا معائنہ کیا، اور ترکی کی نیشنل ڈیفنس یونیورسٹی (NDU) کا بھی دورہ کیا۔ انہوں نے نارتھ سی ایریا کے کمانڈر سے بھی ملاقات کی اور ترکی کے بانی مصطفی کمال اتاترک کے مزار پر حاضری دی اور پھولوں کی چادر چڑھائی۔ایڈمرل نوید اشرف کا یہ دورہ پاکستان اور ترکیہ کے درمیان دیرینہ، ثقافتی و عسکری تعلقات کو مزید مضبوط اور وسعت دینے میں اہم کردار ادا کرے گا۔