اسلام آباد میں گورننس کے مؤثر نظام کے قیام کے لئے آئی سی ٹی گورننس ریفارمز کمیٹی کا اجلاس، شہریوں کو بااختیار بنانے اور نمائندگی کے اصول کو مرکزی حیثیت دی جائے گی، احسن اقبال

اسلام آباد (اُردو پوائنٹ اخبارتازہ ترین - اے پی پی۔ 06 اگست2025ء) وزیرِ اعظم کی جانب سے وفاقی دارالحکومت میں گورننس سے متعلق مسائل کے حل کے لئے قائم کردہ ’’آئی سی ٹی گورننس ریفارمز کمیٹی‘‘ کا اجلاس بدھ کو وزارتِ منصوبہ بندی، ترقی و خصوصی اقدامات میں وفاقی وزیر احسن اقبال کی زیر صدارت منعقد ہوا۔اجلاس میں سینیٹر بیرسٹر ظفراللہ خان، اراکینِ قومی اسمبلی راجہ خرم نواز اور انجم عقیل، ممبر گورننس پلاننگ کمیشن ڈاکٹر عدنان رفیق، کیپٹل ڈویلپمنٹ اتھارٹی (سی ڈی اے)، میٹروپولیٹن کارپوریشن اسلام آباد (ایم سی آئی) اور وزارتِ منصوبہ بندی کے سینئر افسران نے شرکت کی۔

اجلاس کے دوران سینیٹر بیرسٹر ظفراللہ خان نے کمیٹی کی جانب سے تیار کردہ سب کمیٹی کی سفارشات پیش کیں اور اسلام آباد کے موجودہ گورننس نظام میں موجود قانونی و انتظامی خلا اور پیچیدگیوں پر روشنی ڈالی۔

(جاری ہے)

شرکاء نے اس امر پر تشویش کا اظہار کیا کہ وفاقی دارالحکومت میں گورننس کا کوئی واضح اور مربوط ماڈل موجود نہیں جس کے باعث سروس ڈیلیوری اور عوامی فلاح و بہبود پر منفی اثرات مرتب ہو رہے ہیں۔

وفاقی وزیر احسن اقبال نے اجلاس سے خطاب کرتے ہوئے کہا کہ اسلام آباد کے شہریوں کو ایک مؤثر، فعال اور شفاف نظامِ حکمرانی کی فراہمی ریاست کی بنیادی ذمہ داری ہے۔ انہوں نے کہا کہ تمام گورننس اصلاحات کا مرکز شہریوں کو نمائندگی کا حق دینا اور ان کی روزمرہ زندگی سے متعلق فیصلوں میں انہیں شراکت دار بنانا ہونا چاہئے۔انہوں نے اس بات پر زور دیا کہ اسلام آباد کے لئے گورننس ماڈل کو جمہوری اصولوں، شفافیت اور شراکت داری کے تقاضوں سے ہم آہنگ ہونا چاہئے تاکہ یہ ماڈل دیگر شہری مراکز کے لئے بھی قابل تقلید مثال بن سکے۔

احسن اقبال نے کہا کہ اسلام آباد کا محدود سائز اور تنوع اسے گورننس اصلاحات کے لئے ایک مثالی تجربہ گاہ بناتا ہے جسے کامیابی سے نافذ کر کے دوسرے شہروں میں وسعت دی جا سکتی ہے۔اجلاس میں اس امر پر بھی اتفاق کیا گیا کہ اسلام آباد میں اب بھی مارشل لا دور کے 1980 کے صدارتی آرڈیننس نمبر 18 کے تحت گورننس کا نظام رائج ہے جسے فوری طور پر موجودہ جمہوری تقاضوں سے ہم آہنگ کرنے کی ضرورت ہے تاکہ اسلام آباد کو ایک ماڈل اور جدید شہر کے طور پر ترقی دی جا سکے۔وفاقی وزیر نے اجلاس کے شرکاء کا شکریہ ادا کرتے ہوئے اس عزم کا اعادہ کیا کہ حکومت اسلام آباد کے شہریوں کو ایک جامع، مؤثر اور بااختیار گورننس ماڈل فراہم کرنے کے لئے پرعزم ہے۔