پلوامہ میں سکھ خاتو ن کی موت نے مسلمانوں کو بھی غمزدہ کر دیا

جمعرات 7 اگست 2025 12:02

سری نگر (اُردو پوائنٹ اخبارتازہ ترین - اے پی پی۔ 07 اگست2025ء) بھارت کے غیر قانونی زیر تسلط جموں وکشمیر میں ضلع پلوامہ کے علاقے شادی مرگ سے تعلق رکھنے والی سکھ خاتون 35 سالہ سرجیت کور کے انتقال سے اہل خانہ کے ساتھ ساتھ علاقے کے مسلمان بھی غمزدہ ہیں ۔ کشمیر میڈیا میڈیا سروس کے مطابق سرجیت کور کو جگر کا عارضہ لاحق تھا ۔ اسے جگر کی پیوند کاری کے لئے سرینگر کے صورہ ہسپتال میں داخل کیا گیاجہاں ڈاکٹروں نے ٹرانسپلانٹ کی لاگت کا تخمینہ 40 لاکھ روپے لگایا تھا۔

خاتون کے اہل خانہ مالی لحاظ سے مستحکم نہیں تھے لہذا انہو ں نے مالی اعانت کی اپیل کی اور اس حوالے سے سوشل میڈیا کا بھی استعمال کیا گیا۔ چار دن میں 27لاکھ روپے سے زائد رقم جمع ہوگئی۔ مسلمانوں سمیت علاقے کی تمام کمیونٹیز نے خاتون کے علاج کے لئے دل کھول کر عطیات دیئے۔

(جاری ہے)

اگر چہ خاتون کی جان نہیں بچائی جاسکی تاہم یہ واقعہ علاقے میں مسلمانوں اور دیگر فرقوں کے درمیان بھائی چار ے کی ایک عظیم مثال ہے۔

خاتون کے اہل خانہ نے بھر پور تعاون اور یکجہتی پر مسلم کمیونٹی کا شکریہ ادا کرتے ہوئے کہا ہے کہ دکانداروں ، طلبا، کسانوں اور مزدوروں نے بھی اپنی اپنی استطاعت کے مطابق دل کھول کر عطیہ دیا۔ انہوں نے کہا کہ وہ اس بھر پور حمایت اور یکجہتی کو کبھی نہیں بھولیں گے۔ آنجہانی خاتون کی آخری رسومات میں مسلمانوں نے بھی بھر پور مدد کی۔