یوم آزادی کے موقع پر اس بار ایک ساتھ 4 تعطیلات کا امکان

یوم آزادی اور چہلم کے موقع پر امن و امان برقرار رکھنے کیلئے سکیورٹی کے سخت ترین انتظامات کی ہدایت کردی گئی

ساجد علی جمعرات 7 اگست 2025 13:05

اسلام آباد ( اُردو پوائنٹ اخبارتازہ ترین۔ 07 اگست 2025ء ) ملک میں یوم آزادی کے موقع پر اس بار ایک ساتھ 4 تعطیلات کا امکان ہے۔ تفصیلات کے مطابق کابینہ ڈویژن سے جاری نوٹی فکیشن کے تحت پاکستان میں 14 اگست بروز جمعرات)کو یوم پاکستان کے موقع پر عام تعطیل ہوگی، جب کہ اس سے اگلے ہی روز جمعہ 15 اگست کو چہلم امام حسینؓ ویسے تو چہلم کی چھٹی وفاقی تعطیلات میں شامل نہیں ہے تاہم صوبائی سطح پر اس دن مقامی تعطیل ہوتی ہے کیوں کہ گزشتہ سال بھی راولپنڈی اور کراچی میں چہلم کے موقع پر عام تعطیل کا اعلان کیا گیا تھا۔

بتایا گیا ہے کہ ممکنہ طور پر اس دفعہ بھی بعض علاقوں میں یہ تعطیل ہوسکتی ہے اس صورت میں متعلقہ علاقوں میں 15 اگست کو بھی چھٹی ہوگی، اس طرح مخصوص علاقوں میں چہلم کی تعطیل کی صورت میں جمعرات 14 اگست، جمعہ 15 اگست، ہفتہ 16 اور اتوار 17 اگست کی تعطیلات یکجا ہو سکتی ہیں، جب کہ سرکاری حکام کی طرف سے یوم آزادی اور چہلم کے موقع پر امن و امان برقرار رکھنے کیلئے سکیورٹی کے سخت ترین انتظامات کی ہدایت کی گئی ہے۔

(جاری ہے)

دوسری طرف صوبہ پنجاب میں سکولوں کی چھٹیوں میں 31 اگست تک توسیع کرنے کی تجویز پر بھی غور شروع کردیا گیا، لاہور سمیت پنجاب کے سکولوں میں موسمِ گرما کی تعطیلات کا اختتام قریب ہے لیکن فی الحال 15 اگست سے سکول دوبارہ کھولنے سے متعلق کوئی بھی حتمی فیصلہ نہیں ہوا، ذرائع کا کہنا ہے کہ محکمہ سکول ایجوکیشن صوبہ پنجاب میں گرمیوں کی چھٹیوں میں 31 اگست تک توسیع دینے پر غور کر رہا ہے۔

اس سلسلے میں محکمہ تعلیم کے حکام کا مؤقف ہے کہ ’موجودہ موسم میں جاری شدید گرمی اور حبس بچوں کی صحت کے لیے نقصان دہ ثابت ہو سکتا ہے، جس کی وجہ سے صورتحال کو مدنظر رکھتے ہوئے تعطیلات میں اضافے کی تجویز زیر غور ہے‘، صوبائی وزیر تعلیم رانا سکندر حیات نے کہا کہ ’گرمیوں کی چھٹیوں سے متعلق حتمی فیصلہ مشاورت کے بعد کیا جائے گا، سکولوں سے متعلق کوئی بھی فیصلہ موجودہ موسم، والدین کی آراء اور محکمہ موسمیات کی رپورٹس کی روشنی میں جلد متوقع ہے‘۔