نمل اور پی این آر اے کے درمیان تعلیمی و تحقیقی تعاون کے فروغ کے لئے مفاہمتی یادداشت پر دستخط

اسلام آباد (اُردو پوائنٹ اخبارتازہ ترین - اے پی پی۔ 07 اگست2025ء) نیشنل یونیورسٹی آف ماڈرن لینگویجز (نمل) اور پاکستان نیوکلیئر ریگولیٹری اتھارٹی (پی این آر اے )کے درمیان ایک مفاہمتی یادداشت (ایم او یو) پر دستخط کئے گئے جس کا مقصد پیشہ وارانہ ترقی، تربیت، تحقیق اور علمی تبادلے کے میدان میں باہمی تعاون کو فروغ دینا ہے۔ نمل سے جاری پریس ریلیز کے مطابق دستخطی تقریب نمل کے اسلام آباد کیمپس میں منعقد ہوئی۔

مفاہمتی یادداشت پر نمل کے ڈائریکٹر جنرل بریگیڈیئر شہزاد منیر اور پی این آر اے کے ڈائریکٹر جنرل محمد وقاص شیرانی نے دستخط کئے۔ تقریب میں نمل کے ریکٹر میجر جنرل (ر) شاہد محمود کیانی ہلال امتیاز (ملٹری) سمیت دونوں اداروں کے سینئر افسران بھی شریک تھے۔اس مفاہمتی یادداشت کے تحت نمل اور پی این آر اے نے باہمی دلچسپی کے کئی اہم شعبوں میں تعاون پر اتفاق کیا ہے۔

(جاری ہے)

دونوں ادارے علمی و پیشہ وارانہ وسائل کا تبادلہ کریں گے تاکہ تعلیمی و ریگولیٹری صلاحیتوں کو فروغ دیا جا سکے۔ اس شراکت داری کا مقصد ادارہ جاتی ترقی اور استعداد کار میں اضافے کے لئے ایک دوسرے کی مہارت سے فائدہ اٹھانا ہے۔ مفاہمتی یادداشت میں خصوصی تربیتی کورسز کے نصاب کی تیاری اور بہتری کے لئے تعاون کو بھی اہمیت دی گئی ہے تاکہ یہ کورسز جدید پیشہ وارانہ تقاضوں سے ہم آہنگ ہوں۔

مزید برآں، پی این آر اے کے افسران کو نمل کی جانب سے پیش کئے جانے والے مختلف زبانوں کے کورسز میں شرکت کا موقع فراہم کیا جائے گا۔اس معاہدے کے تحت پی این آر اے کے افسران نمل کے ایگزیکٹو ڈویلپمنٹ سینٹر کے تربیتی پروگرامز میں بھی شرکت کر سکیں گے جو قیادت، نظم و نسق اور حکمت عملی کی مہارتوں کو بہتر بنانے کے لئے ڈیزائن کئے گئے ہیں۔ اسی طرح نمل کے طلبہ کو پی این آر اے میں انٹرن شپ کے مواقع بھی فراہم کئے جائیں گے تاکہ وہ ایک متحرک اور بااثر ریگولیٹری ماحول میں عملی تجربہ حاصل کر سکیں۔

اس موقع پر ریکٹر نمل نے تعلیمی اداروں اور ریگولیٹری اداروں کے درمیان روابط کو قومی ترقی اور استعداد کار کے فروغ کے لئے ناگزیر قرار دیا۔ انہوں نے کہا کہ یہ شراکت داری نمل کے اس عزم کی عکاس ہے جس کے تحت وہ تعلیمی اور پیشہ وارانہ افق کو مزید وسعت دینا چاہتا ہے۔