دنیا کی سب سے بڑی ٹیک کمپنی ایپل کا امریکا میں مزید 100 ارب ڈالر کی سرمایہ کاری کا اعلان

ایپل کی جانب سے امریکا میں کی جانے والی مجموعی سرمایہ کاری اگلے 4 سالوں میں 600 ارب ڈالر تک پہنچ جائے گی

محمد علی جمعرات 7 اگست 2025 18:34

واشنگٹن (اُردو پوائنٹ اخبارتازہ ترین۔ 07 اگست2025ء) دنیا کی سب سے بڑی ٹیک کمپنی ایپل کا امریکا میں مزید 100 ارب ڈالر کی سرمایہ کاری کا اعلان ، ایپل کی جانب سے امریکا میں کی جانے والی مجموعی سرمایہ کاری اگلے 4 سالوں میں 600 ارب ڈالر تک پہنچ جائے گی۔ تفصیلات کے مطابق امریکی صدر ڈونلڈ ٹرمپ کی جانب سے اقتدار میں آنے کے بعد سے امریکی ٹیک کمپنیوں پر پیداواری پلانٹس امریکا واپس لانے کیلئے مسلسل دباو ڈالا جا رہا تھا۔

خاص کر دنیا کی سب سے بڑی ٹیک کمپنی ایپل پر امریکی صدر کی جانب سے دباو ڈالا جا رہا تھا کہ وہ چین اور بھارت میں پیدواری پلانٹس لگانے کے بجائے امریکا میں ایسے پلانٹس لگائے۔ اس حوالے سے جمعرات کے روز اس حوالے سے اہم پیش رفت ہوئی۔ امریکی ٹیکنالوجی کمپنی ایپل نے امریکا میں مزید 100 ارب ڈالر کی سرمایہ کاری کا اعلان کیا ہے۔

(جاری ہے)

جمعرات کے روز امریکی صدر ڈونلڈ ٹرمپ نے وائٹ ہائوس میں ایپل کے سی ای او ٹم کک کے ہمراہ اعلان کیا کہ ایپل امریکہ میں مزید 100 ارب ڈالر کی سرمایہ کاری کرے گا جس سے اگلے چار سال میں اس کی مجموعی سرمایہ کاری 600 ارب ڈالر تک پہنچ جائے گی۔

ڈونلڈ ٹرمپ نے کہاکہ ایپل اپنے مقامی سپلائی چین پر اخراجات میں بڑے پیمانے پر اضافہ کرے گا۔ اس موقع پر انہوں نے ریاست کینٹکی میں آئی فون اسکرینز میں استعمال ہونے والے گلاس کی تیاری کے لیے نئے پیداواری مرکز کا بھی ذکر کیا۔ فروری میں ایپل نے اعلان کیا تھا کہ وہ امریکا میں 500 ارب ڈالر سے زائد خرچ کرے گا اور 20 ہزار افراد کو ملازمت دے گا ۔

یہ سرمایہ کاری ان منصوبوں میں توسیع ہے جو ایپل نے 2021 میں اعلان کیے تھے، جب اس نے کہا تھا کہ وہ امریکا میں 430 ارب ڈالر کی سرمایہ کاری کرے گا اور پانچ سال میں 20,000 نئی ملازمتیں پیدا کرے گا۔ ٹم کک نے اوول آفس میں کہا کہ صرف اس سال امریکی کارخانے 19 ارب چپس تیار کرنے جا رہے ہیں جو ایپل کے لیے 12 مختلف ریاستوں میں قائم 24 فیکٹریوں میں بنائی جائیں گی۔ ٹم کک نے وضاحت کی کہ اگرچہ آئی فون کے کئی پرزے امریکا میں تیار کیے جائیں گے مگر مکمل اسمبلنگ بیرون ملک ہی کی جائے گی۔