حکومت نے امریکی ٹیرف سے پاکستان کو ایک ارب ڈالر کے نقصان کی تردید کردی

ٹیرف میں کمی کے بعد امریکی مارکیٹ میں پاکستانی مصنوعات کی فروخت میں اضافہ ہوگا،وفاقی وزیر تجارت

جمعرات 7 اگست 2025 22:50

حکومت نے امریکی ٹیرف سے پاکستان کو ایک ارب ڈالر کے نقصان کی تردید کردی

اسلام آباد(اُردو پوائنٹ اخبارتازہ ترین - این این آئی۔ 07 اگست2025ء)وفاقی حکومت نے امریکی ٹیرف عائد ہونے سے پاکستان کو ایک ارب ڈالر کے نقصان کی تردید کرتے ہوئے کہاہے کہ ٹیرف میں کمی کے بعد امریکی مارکیٹ میں پاکستانی مصنوعات کی فروخت میں اضافہ ہوگا۔وفاقی وزیرتجارت جام کمال نے امریکی ٹیرف سے متعلق قومی اسمبلی میں جواب پیش کرتے ہوئے کہا کہ امریکا نے پاکستان پرٹیرف 29 فیصد سیکم کرکے 19 فیصد کردیا ہے۔

(جاری ہے)

جام کمال نے بتایا کہ ٹیرف میں کمی کے بعد امریکی مارکیٹ میں پاکستانی مصنوعات کی فروخت میں اضافہ ہوگا اور پاکستان کی ٹیکسٹائل کی برآمدات میں بھی اضافے کا امکان ہے۔ بعد ازاں اسپیکر قومی اسمبلی نے اس معاملے پر وزارت خزانہ کے سوالات نہ آنے پر سیکرٹری خزانہ کو بھی ایوان میں طلب کرلیا۔ اسپیکر نے فنانس کمیٹی کے چیئرمین کوبھی سیکرٹری اورگورنر اسٹیٹ بینک کو بلانے کی ہدایات جاری کرتے ہوئے کہا کہ اگر گورنر اسٹیٹ بینک کوبھی طلب کرنا پڑا تو کریں گے۔