پنجاب یونیورسٹی شعبہ سوشل ورک کے زیر اہتمام ڈیجیٹل تبدیلی پر سیمینار کا انعقاد

جمعرات 7 اگست 2025 23:30

لاہور (اُردو پوائنٹ اخبارتازہ ترین - اے پی پی۔ 07 اگست2025ء) پاکستان کے79ویں یوم آزادی کی تقریبات کے سلسلے میں پنجاب یونیورسٹی شعبہ سوشل ورک کے زیراہتمام سنٹرآف انفارمیشن ٹیکنالوجی کے تعاون سے’’ ڈیجیٹل تبدیلی 2047 تک کا روڈ میپ ‘‘کے موضوع پر سیمینار کا انعقاد کیاگیا۔ترجمان کے مطابق سیمینار میں چیئرپرسن شعبہ سوشل ورک پروفیسر ڈاکٹر عظمی عاشق، ڈائریکٹرسنٹر آف انفارمیشن ٹیکنالوجی سر سید عمار جعفری، ماہرین بشمول نبیلہ انتصار، عنبرین سپرا، ساحر ملک، ارم شاہین ملک، فیکلٹی ممبران ودیگرنے شرکت کی۔

سیمینار سے خطاب کرتے ہوئے ڈاکٹر عظمی عاشق نے کہا کہ یہ تقریب پاکستان کے 79ویں یوم آزادی کے سلسلے کی کڑی ہے جس میں ملک کے ڈیجیٹل اور جامع مستقبل کے لیے پختہ عزم کا اظہار کیا گیا۔

(جاری ہے)

انہوں نے کہا کہ سیمینارشعبہ کے غیر متزلزل مشن کی عکاسی کرتا ہے،کمیونٹیز کو بااختیار بنانا، سماجی انصاف کو فروغ دینا اور اس بات کو یقینی بنانا کہ ڈیجیٹل دور میں کوئی بھی پیچھے نہ رہے۔

انہوں نے کہاکہ یہ ظاہر کرتا ہے کہ کہ سوشل ورک کی تعلیم کس طرح ابھرتی ہوئی ٹیکنالوجیز، ڈیجیٹل خواندگی اور پالیسی جدت طرازی کے ذریعے عصری عالمی چیلنجوں سے ہم آہنگ ہو رہی ہے۔ڈائریکٹر سی آئی ٹی سر سید عمار جعفری نے 2047 تک ڈیجیٹل طور پر بااختیار، جامع پاکستان کے لیے ایک متاثر کن روڈ میپ پیش کیا۔ انہوں نے کہا کہ سیمینار نے ڈیجیٹل جدت، جامع ترقی اور پائیدار پیش رفت کے ساتھ سماجی کام کی اقدار کو تلاش کرنے کے لیے ایک پلیٹ فارم کے طور پر کام کیاہے۔

ماہرین نے ڈیجیٹل تعلیم اور مہارت کی ترقی، مصنوعی ذہانت سے چلنے والی پالیسی سازی اور اکیڈیمیا میں تحقیق، سماجی تحفظ کے دائرے میں سائبر سکیورٹی، ابھرتی ہوئی ٹیک اسپیسز میں خواتین اور نوجوانوں کی شمولیت، ایس ڈی جی فریم ورک کے ساتھ تعلیمی اصلاحات کو ہم آہنگ کرنے پر روشنی ڈالی۔