برطانیہ میں 200 رائٹرز کا اسرائیل کے مکمل بائیکاٹ کا مطالبہ

غزہ جنگ کے خاتمے تک اسرائیل کا فوری اور مکمل بائیکاٹ کریں،خط میں مطالبہ

جمعہ 8 اگست 2025 17:55

لندن(اُردو پوائنٹ اخبارتازہ ترین - این این آئی۔ 08 اگست2025ء)برطانیہ میں 200 سے زائد رائٹرز نے ایک کھلے خط میں اسرائیل کے مکمل بائیکاٹ کا مطالبہ کیا ہے۔عرب ٹی وی کے مطابق یہ خط اس وقت سامنے آیا ہے جب انٹیگریٹڈ فوڈ سکیورٹی فیز کلاسیفکیشن نے خبردار کیا کہ غزہ میں قحط جیسی صورتحال پیدا ہو چکی ہے۔خط پر دستخط کرنے والوں میں زاڈی سمتھ، مائیکل روزن، اروین ویلش، حنیف قریشی، برائن اینو، ایلیف شفق، جارج مونبیوٹ اور جیف ڈائر سمیت کئی معروف نام شامل ہیں۔

خط میں لکھا گیا ہے کہ مصنفین تمام افراد، اداروں، حکومتوں اور ریاستوں سے مطالبہ کرتے ہیں کہ اسرائیل کے ساتھ ہر قسم کی تجارت، لین دین اور کاروبار کا فوری اور مکمل بائیکاٹ کریں ، جب تک غزہ کے عوام کو پینے کا پانی، خوراک، طبی امداد، اور دیگر ضروریات زندگی اقوام متحدہ کی نگرانی میں مناسب مقدار میں فراہم نہ کر دی جائیں۔

(جاری ہے)

خط میں دستخط کنندگان نے لکھا کہ ہم یہ مطالبہ اس لیے کر رہے ہیں کیونکہ دنیا بھر میں لاکھوں افراد اور ہزاروں سیاستدانوں کے الفاظ اور جذبات بھی غزہ کے عوام تک خوراک پہنچانے، شہریوں کے تحفظ، اور انسانی و طبی امداد کی فراہمی میں ناکام ہو چکے ہیں۔

مصنفین نے اس بات پر افسوس کا اظہار کیا کہ یہ بائیکاٹ اسرائیل اور دیگر ممالک میں موجود ان افراد اور گروہوں کو بھی متاثر کرے گا جو وزیراعظم نیتن یاہو کی حکومت کی پالیسیوں کو مسترد کرتے ہیں،وہ افراد جن کا درد اور غزہ کے عوام کے لیے ہمدردی ہم محسوس کرتے ہیں۔دستخط کنندگان نے کہا کہ یہ بائیکاٹ اس وقت تک برقرار رہنا چاہیے جب تک اقوام متحدہ یہ تصدیق نہ کر دے کہ غزہ کی شہری آبادی محفوظ ہے اور انہیں مناسب خوراک و امداد حاصل ہو چکی ہے۔