لاہور ہائیکورٹ، صارفین کے تحفظ کیلئے مقدمات پنجاب بھر کی سیشن عدالتوں کو منتقل کرنے کے احکامات جاری

جمعہ 8 اگست 2025 18:47

لاہور (اُردو پوائنٹ اخبارتازہ ترین - اے پی پی۔ 08 اگست2025ء) چیف جسٹس لاہور ہائیکورٹ جسٹس عالیہ نیلم نے صارفین کے تحفظ کیلئے صارفین کے کیسز لاہور سمیت پنجاب بھر کی سیشن عدالتوں کو منتقل کرنے کے احکامات جاری کئے ہیں ،پنجاب میں17کنزیومر کورٹس ختم ہونے سے چیف جسٹس کے اقدامات سے قومی خزانہ کو کروڑں روپے کی بچت ہوگی،چیف جسٹس لاہور ہائیکورٹ جسٹس عالیہ نیلم سائلین کو بروقت انصاف کی فراہمی یقینی بنانے اور وکلا کی فلاح و بہبود کیلئے تاریخی اقدامات کرنے کے ساتھ ساتھ انتظامی سطح پر بھی انقلابی اقدامات کر رہی ہیں،پنجاب کی17کنزیومر عدالتوں میں کیسز کی دائر کرنے کی شرح انتہائی کم تھی لیکن ان عدالتوں کے قیام کے باعث قومی خزانہ کو ہر مہینے کروڑوں روپے کا بوجھ اٹھانا پڑتا تھا لیکن پنجاب حکومت نے قانون میں ترمیم کرکے ان عدالتوں کوختم کیا تو چیف جسٹس نے صارفین کے تحفظ کیلئے اقدامات کا حکم دیدیا اور کنزیومر عدالتوں میں زیر سماعت تمام کیسز پنجاب کی سیشن عدالتوں میں منتقل کردیئے۔

(جاری ہے)

چیف جسٹس عالیہ نیلم کے حکم پر سیشن عدالتوں کو کیسز کیلئے نامزد کردیا گیا ہے،جس کے باعث صارفین کے حقوق کا عملی طور پرتحفظ ہونے کے ساتھ ساتھ بروقت انصاف کی فراہمی بھی یقینی بنائی جاسکے گی،چیف جسٹس عالیہ نیلم کی جانب سے صارفین کے حقوق کے تحفظ کو یقینی بنانے پر وکلا نے چیف جسٹس کو زبردست خراج تحسین پیش کیا ۔