میر ضیاءاللہ لانگو کا سانحہ 8 اگست 2016 کے شہداءکو خراج عقیدت

جمعہ 8 اگست 2025 22:20

کوئٹہ (اُردو پوائنٹ اخبارتازہ ترین - اے پی پی۔ 08 اگست2025ء) بلوچستان عوامی پارٹی کے مرکزی نائب صدر میر ضیاءاللہ لانگو نے سانحہ 8 اگست 2016 کے شہداءکو خراج عقیدت پیش کرتے ہوئے کہا ہے کہ یہ دن صوبہ اور ملک کی تاریخ کا ایک سیاہ باب ہے جو ہمیشہ یاد رکھا جائے گا۔ان خیالات کا اظہار انہوں نے سانحہ 8 اگست کے شہداءکی نویں برسی کے موقع پر اپنے تعزیتی بیان میں کیا۔

انہوں نے کہا کہ نو برس قبل کوئٹہ میں ہونے والا یہ المناک واقعہ نہ صرف درجنوں قیمتی جانیں لے گیا بلکہ صو بہ کے عوام کو گہرے صدمے میں مبتلا کر گیا،سانحہ کے شہداءنے وکالت کے پیشے اور جمہوری اقدار کے تحفظ کے لئے اپنی جانوں کا نذرانہ پیش کیا ان کی قربانیاں رائیگاں نہیں جائیں گی ،انہوں نے کہاکہ 8اگست 2016کے دن وکلاء، صحافیوں اور دیگر بے گناہ افراد کی شہادت نے قوم کو متحد کیا اور دہشتگردی کے خلاف عزم کو مزید مضبوط بنایا دہشتگردوں نے معصوم جانوں کو نشانہ بنا کر انسانیت کے خلاف بدترین جرم کیا لیکن ہمارے شہداءکی قربانیاں رائیگاں نہیں جائیں گی ۔

(جاری ہے)

میر ضیاءاللہ لانگو نے کہاکہ 8 اگست کا دن ہمیں یہ پیغام دیتا ہے کہ ہم دہشت گردی اور انتہا پسندی کے خلاف اپنی جدوجہد جاری رکھیں تاکہ آئندہ نسلیں امن و سلامتی کے ماحول میں زندگی گزار سکیں۔ انہوں نے دعا کی کہ اللہ تعالیٰ شہداءکے درجات بلند کرے اور ان کے اہل خانہ کو صبر جمیل عطا فرمائے۔