زائرین کے لئے راستہ سیکیورٹی وجوہات پر عارضی طور پر بند کیا ہے ، گورنرسندھ

مستقبل بنیادوں پر بند کرنے کی کوئی با ت نہیں ۔ مجلس وحدت المسلمین پاکستان ، کراچی کے آفس پر میڈیا سے گفتگو

ہفتہ 9 اگست 2025 17:15

زائرین کے لئے راستہ سیکیورٹی وجوہات پر عارضی طور پر بند کیا ہے ، گورنرسندھ

کراچی (اُردو پوائنٹ اخبارتازہ ترین - این این آئی۔ 09 اگست2025ء) گورنر سندھ کامران خان ٹیسوری نے کہا ہے کہ زائرین کے لئے راستہ سیکیورٹی وجوہات پر عارضی طور پر بند کیا ہے، مستقل بنیادوں پر بند کرنے کی کوئی بات نہیں۔ ان خیالات کا اظہار انہو ں نے مجلس وحدت المسلمین پاکستان کراچی کے آفس میں علامہ احمد اقبال رضوی سے ملاقات کے دوران کیا ۔بعد ازاں گورنر سندھ کامران خان ٹیسوری نے علامہ احمد اقبال رضوی کے ہمراہ میڈیا سے گفتگو کرتے ہوئے کہا کہ زائرین کے احساسات کی قدر کرتا ہوں اور ان کے ساتھ کھڑا ہوں۔

(جاری ہے)

انہو ں نے کہا کہ کمیٹی بنائی گئی ہے جو ایئر ٹکٹس اور دیگر معاملات پر کام کر رہی ہے۔ انہوں نے کہا کہ زائرین کے مسئلے کو مشاورت سے حل کیا جائے گا، تمام زائرین اربعین پہنچیں گے ۔ انہوں نے کہا کہ تفتان بارڈر پر موجود زائرین کو ایران روانہ کرنے کے اقدامات جاری کئے گئے ہیں ۔میڈیا سے گفتگو کرتے ہوئے علامہ احمد اقبال رضوی نے مسائل کے حل کے لئے کئے گئے گورنر سندھ کامران خان ٹیسوری کے اقدامات کو سراہا۔ اس موقع پر ایم کیو ایم پاکستان کے سینئر مرکزی رہنماء انیس قائم خانی و دیگر بھی موجود تھے۔