حکومت کی جانب سے ٹیکس پالیسی کو نرم کرنے سے تاجر برادری کو ریلیف ملا ہے، شاہد عمران

اتوار 10 اگست 2025 13:20

لاہور (اُردو پوائنٹ اخبارتازہ ترین - اے پی پی۔ 10 اگست2025ء) فیڈریشن آف پاکستان چیمبرز آف کامرس اینڈ انڈسٹری کی ریجنل کمیٹی برائے خوراک کے کنوینر شاہد عمران نے کہا ہے کہ حکومت کی جانب سے متعدد بجٹ اقدامات کو تبدیل اور ٹیکس پالیسی کو نرم کرنے کے فیصلے سے تاجر برادری کو بڑا ریلیف ملا ہے۔ اتوار کو یہاں فوڈ ایکسپورٹرز کے وفد سے گفتگو کرتے ہوئے انہوں نے کہا کہ یہ امر خوش آئند ہے کہ سیلز ٹیکس ایکٹ کے سیکشن 37A کے تحت ایف بی آر کو دیے گئے اختیارات کو محدود کر دیا گیا ہے اور اب یہ اختیارات صرف جعلی یا فلائنگ انوائسز کے سیلز ٹیکس فراڈ کے سنگین معاملات میں استعمال ہوں گے۔

جبکہ انکم ٹیکس کمشنر اور تسلیم شدہ تجارتی اداروں کے دو نامزد افراد تحقیقات کی منظوری دیں گے۔

(جاری ہے)

انہوں نے کہا کہ معاشی ترقی کو برقرار رکھنے، سرمایہ کاری کو راغب کرنے اور مناسب قیمتوں پر ضروری اشیائے خوردونوش کی دستیابی کو یقینی بنانے کے لیے ایک مستحکم اور کاروبار دوست ٹیکس نظام ضروری ہے۔ شاہد عمران نے حکام پر زور دیا کہ وہ طویل مدتی مالیاتی پالیسیاں تیار کرنے کے لیے نجی شعبے کے ساتھ مشاورت جاری رکھیں تاکہ معاشی استحکام کے ساتھ محصولات میں توازن پیدا کیا جا سکے۔ انہوں نے کہا کہ صدر عاطف اکرم شیخ کی قیادت میں ایف پی سی سی آئی غذائی صنعتوں میں پائیدار ترقی کو فروغ دینے والے اقدامات کی حمایت کے لیے پرعزم ہے۔