گورنر ہائوس میں 50ہزار بچے جدید آئی ٹی کورس کر کے ڈالرز میں کما رہے ہیں ، گورنر سندھ

اتوار 10 اگست 2025 19:20

کراچی (اُردو پوائنٹ اخبارتازہ ترین - اے پی پی۔ 10 اگست2025ء) گورنر سندھ کامران خان ٹیسوری نے کہاہے کہ گورنر ہائوس میں 50ہزار بچے جدید آئی ٹی کورس کر کے ڈالرز میں کما رہے ہیں ، یہ نوجوان ہمارا فخر ہیں۔اتوار کو گورنر ہائوس سے جاری اعلامیہ کے مطابق ان خیالات کا اظہار انہوں نے "معرکہ حق۔ جشنِ آزادی" کے سلسلے میں نیو کراچی سیکٹر 11-G میں منعقدہ تقریب سے خطاب کے دوران کیا۔

اس سے قبل گورنر سندھ کا نیو کراچی آمد پر شہریوں نے پھولوں کی پتیاں نچھاور کر کے والہانہ استقبال کیا۔ اس موقع پر فضا "پاکستان زندہ باد" کے نعروں سے گونج اٹھی اور شرکاء کا جوش و خروش قابلِ دید تھا۔گورنر سندھ نے کہا کہ گورنر ہائوس کے دروازے عوامی مسائل کے حل کے لیے ہمیشہ کھلے ہیں،شہری امید کی گھنٹی بجا کر اپنا مسئلہ براہِ راست گورنر ہائوس تک پہنچا کر حل کروا سکتے ہیں۔

(جاری ہے)

انہوں نے تقریب سے خطاب کرتے ہوئے کہاکہ پاک افواج نے دشمن کو دھول چٹائی ، ہم ایک فاتح قوم ہیں۔ انہوں نے کہا کہ کامیابی کے لیے محنت ضروری ہے اور اتحاد سے ہر مشکل آسان ہو جاتی ہے،کراچی کی ترقی کے لیے سب کو مل کر کام کرنا ہوگا ، یہی ہمارا قومی فرض ہے۔ انہوں نے مزید کہا کہ بڑوں کی عزت اور احترام کو ہمیشہ مقدم رکھیں، یہی ہماری تہذیب اور تربیت ہے۔تقریب میں شاندار آتش بازی کا مظاہرہ بھی کیا گیا، جس نے جشنِ آزادی کی رونق کو دوبالا کر دیا۔ اس موقع پر ایم کیو ایم پاکستان کے سینئر رہنما انیس قائم خانی، ڈاکٹر عبدالباسط ، ریحان اکرام اور دیگر معزز شخصیات بھی موجود تھیں۔