نیلم کلچرل فیسٹیول میں رنگا رنگ تقریبات‘ معرکہ حق کی جیت اور آزادی کا جشن

عوام نے معرکہ حق میں تاریخی فتح پر افواج پاکستان کو زبردست خراج تحسین پیش کیا

پیر 11 اگست 2025 12:32

وادی نیلم (اُردو پوائنٹ اخبارتازہ ترین - این این آئی۔ 11 اگست2025ء)وادی نیلم کے علاقے کیل میں معرکہ حق اور جشن آزادی کی تقریبات کے تحت نیلم کلچرل فیسٹیول کا انعقاد کیا گیا۔ یہ فیسٹیول پاک فوج اور آزاد کشمیر کلچرل اکیڈمی کے اشتراک سے منعقد ہوا اور اس ثقافتی میلے میں مقامی افراد کی بڑی تعداد نے بھرپور شرکت کی۔میلے میں اسکول کے بچوں کے ٹیبلو، کالج طلبہ کا شینہ گیت اور روایتی رقص گٹکا پیش کیا گیا۔

(جاری ہے)

جشن آزادی اور معرکہ حق میں کامیابی کے موضوع پر تقاریر کی گئیں اور ماحولیاتی تحفظ اور سیاحت کے فروغ پر بات چیت اور عوام کو ترغیب دی گئی۔اس موقع پر مہمان خصوصی چیف سیکرٹری خوشحال خان نے شرکا میں انعامات اور سونیئر تقسیم کیے۔ مقامی عوام نے ثقافتی میلے کو اتحاد، یکجہتی اور ثقافتی ورثے کے فروغ کا ذریعہ قرار دیا۔ عوام نے معرکہ حق میں تاریخی فتح پر افواج پاکستان کو زبردست خراج تحسین پیش کیا۔منتظمین کی کاوشوں کو سراہتے ہوئے عوام نے فیسٹیول کے انعقاد پر خوشی کا اظہار کیا۔