"پاک سر زمین" آئی ایس پی آر نے جواد احمد کی آواز میں نیا ملی نغمہ جاری کردیا

یوم آزادی پر جاری کیے جانے والے اس نغمے کے بول قومی ترانے کی پہلی سطر''پاک سر زمین شاد باد'' سے متاثر ہیں

ساجد علی پیر 11 اگست 2025 14:11

"پاک سر زمین" آئی ایس پی آر نے جواد احمد کی آواز میں نیا ملی نغمہ جاری ..

راولپنڈی ( اُردو پوائنٹ اخبارتازہ ترین۔ 11 اگست 2025ء ) مسلح افواج کے شعبہ تعلقات عامہ آئی ایس پی آر نے گلوکار جواد احمد کی آواز میں نیا ملی نغمہ جاری کر دیا۔ تفصیلات کے مطابق پاک فوج کے ترجمان ادارے کی جانب سے پاکستان کے یوم آزادی کے موقع پر جواد احمد کی آواز میں خصوصی ملی نغمہ جاری کیا گیا ہے، اس نغمے میں جواد احمد نے اپنی آواز کے سُر بکھیرے ہیں جب کہ نغمے کے بول قومی ترانے کی پہلی سطر''پاک سر زمین شاد باد'' سے متاثر ہیں۔

اس نغمے میں پاکستانی قوم کی ہمت، بہادری اور محنت کو اجاگر کیا گیا ہے، یہ نغمہ ملک کی مختلف اقوام کی یکجہتی، جذبے اور قومی اتحاد کی عکاسی کرتا ہے، نغمے میں وطن کے محافظوں کو شیر اور شاہین سے تشبیہ دیتے ہوئے ہر سطر میں حب الوطنی اور پاکستان سے محبت کے جذبے کو نمایاں کیا گیا ہے، یہ نغمہ قوم میں جذبہ حب الوطنی پیدا کرنے کی صلاحیت رکھتا ہے، جس میں معرکہ حق میں ملنے والی شاندار فتح کو قومی اتحاد کا ایک واضح ثبوت بتایا گیا ہے۔

(جاری ہے)

آئی ایس پی آر نے جواد احمد کی آواز میں نیا ملی نغمہ جاری کردیا !!#Pakistan #ISPR #JawadAhmed #14thAugust pic.twitter.com/gtQNzZy5QY
— SAJID ALI (@SajidAli03) August 11, 2025

اس سے پہلے بھی مسلح افواج کے شعبہ تعلقات عامہ نے ایک نغمہ ’دل سے پاکستان‘ کے عنوان سے جاری کیا، اس ملی نغمے کو حال ہی میں بھارت کے خلاف ’معرکۂ حق‘ میں ہونے والی عظیم فتح کی یادگار کے طور پر پیش کیا گیا ہے، نغمے میں وطن عزیز کے دفاع کے لیے قربان ہونے والے جاں نثار شہداء کو خراجِ عقیدت پیش کرتے ہوئے ان کی قربانیوں کو سنہری الفاظ میں سراہا گیا ہے۔

’’دل سے پاکستان‘‘ پاک فوج نے یوم آزادی پر نیا نغمہ جاری کر دیا !!#ISPR #Pakistan #14thAugust #IndependenceDay pic.twitter.com/4SRfm9t0Qt
— SAJID ALI (@SajidAli03) August 2, 2025

اس کے علاوہ آئی ایس پی آر نے اس نغمے میں بھارت کے خلاف ’معرکۂ حق‘ میں ملنے والی کامیابی کو جشن جوش و جذبے سے بھرپور انداز میں پیش کیا، اس کے ساتھ ہی آئندہ بھی وطن کی بقاء، خودمختاری اور سلامتی کے لیے ہر قربانی دینے کے عزم کا بھی اظہار کیا گیا ہے، اس ملی نغمے کے ذریعے مادرِ وطن کے محافظ مسلح افواج کے کردار کو خراجِ تحسین بھی پیش کیا گیا ہے، آئی ایس پی آر کی طرف سے پاکستان کے یوم آزادی کی مناسبت سے جاری کیا جانے والے اس نغمہ ’دل سے پاکستان‘ کے ذریعے قومی یکجہتی، ترقی اور استحکام کے عہد کی تجدید کی گئی ہے۔