غزہ میں اسرائیلی بمباری سے مشہور فٹبالر سلیمان عبید سمیت 662 کھلاڑی شہید

پیر 11 اگست 2025 18:08

غزہ (اُردو پوائنٹ اخبارتازہ ترین - این این آئی۔ 11 اگست2025ء)غزہ میں جاری اسرائیلی بمباری اور حملوں کے دوران عالمی شہرت یافتہ فلسطینی فٹبالر سلیمان عبید سمیت 662 فلسطینی کھلاڑی اور اسپورٹس عہدیدار شہید ہو چکے ہیں۔ فلسطینی فٹبال ایسوسی ایشن کے مطابق اکتوبر 2023 سے غزہ اور مقبوضہ مغربی کنارے میں اسرائیلی فوج نے 288 کھیلوں کے میدان، اسٹیڈیم، جم اور کلب تباہ کر دیے۔

حالیہ دنوں غزہ میں اسرائیلی حملے میں پیلے آف فلسطین کے نام سے مشہور فٹبالر سلیمان العبید بھی شہید ہوئے۔

(جاری ہے)

ایسوسی ایشن کا کہنا تھا کہ بمباری سے غزہ میں فلسطینی فٹبال ایسوسی ایشن کا ہیڈکوارٹر بھی مکمل طور پر تباہ ہو گیا۔ اسرائیلی حملوں میں مزید 52 فلسطینی شہید ہوئے جبکہ اسرائیلی محاصرے اور جبری قحط کے باعث غذائی قلت سے ہلاک ہونے والوں کی تعداد 217 ہو گئی، جن میں 100 بچے شامل ہیں۔ اسرائیلی وزیراعظم نے کہا کہ حماس کے ہتھیار ڈالنے سے انکار کے بعد اس کا خاتمہ کرنے کے سوا کوئی راستہ نہیں، جبکہ حماس نے ردعمل میں کہا کہ نیتن یاہو حقائق چھپا کر جنگی جرائم کا جواز پیش کر رہے ہیں اور جنگ کو طول دینے کے لیے یرغمالیوں کو استعمال کر رہے ہیں۔