کرنل شیر خان اسٹیڈیم پشاور میں جشن آزادی پاکستان کنسرٹ تقریب کا اہتمام کیا جائے گا

پشاور (اُردو پوائنٹ اخبارتازہ ترین - اے پی پی۔ 11 اگست2025ء) کرنل شیر خان اسٹیڈیم ( آرمی اسٹیڈیم ) پشاور میں 13 اگست کی رات جشن آزادی پاکستان کنسرٹ تقریب کا اہتمام کیا جائے گا۔جس میں پاکستان کے نامور گلوکار اپنے فن کا مظاہرہ کریں گے، اس کے علاوہ روایتی کھانوں کے فوڈ اسٹالز بھی لگائے جائیں گے،موسیقی کے پروگرام کے دوران رات 12 بجتے ہی شاندار آتش بازی کا مظاہرہ کیا جائے گا۔

تقریب میں عوام اور فیملیز کا داخلہ مفت بذریعہ رجسٹریشن ہوگا ۔رجسٹریشن کے لیے صوبائی دارالحکومت پشاور کے دس مقامات کا تعین کیا گیا ہے جس میں شناختی کارڈ کے ذریعے رجسٹریشن کی جائے گی جشن آزادی پاکستان کنسرٹ میں زیادہ سے زیادہ عوام کی شرکت، تقریب کی سکیورٹی اور انتظامات کو حتمی شکل دینے کے حوالے سے کمشنر پشاورریاض خان محسود اور کمانڈر 102 بریگیڈ علی اصغر خان کی زیر صدارت اہم اجلاس منعقد ہوا۔

(جاری ہے)

جس میں پشاور ڈویژن کے تمام پانچوں اضلاع پشاور، نوشہرہ، چارسدہ، قبائلی ضلع مہمند اور ضلع خیبر کے ڈپٹی کمشنرز، میئر پشاور حاجی زبیر علی، ڈائریکٹر جنرل پشاور ڈویلپمنٹ اتھارٹی شاہ فہد، بلدیاتی حکام اور پشاور کے تمام تاجر تنظیموں کے نمائندوں نے شرکت کی ۔اجلاس میں شرکاء کو جشن آزادی پاکستان کنسرٹ کے انعقاد کے حوالے سے تفصیلی آگاہی دی گئی جبکہ پشاور کے تمام پانچوں اضلاع کے ڈپٹی کمشنرز نے اپنے اضلاع میں جشن آزادی شایان شان طریقے سے منانے کے حوالے سے تفصیلی آگاہی دی۔

اجلاس میں جشن آزادی پاکستان کنسرٹ میں زیادہ سے زیادہ عوام کی شرکت یقینی بنانے کے لیے اپنی سطح پر اقدامات کی ہدایات جاری کیے گئے اور ان کو اعتماد میں لیا گیا ۔اجلاس سے خطاب کرتے ہوئے کمشنر پشاور ڈویژن ریاض خان محسود نے کہا کہ امسال جشن آزادی معرکہ حق شایان شان طریقے سے منائی جائے گی رجسٹریشن کے لیے دس مقامات کا تعین کیا گیا ہے جس میں حیات آباد سپورٹس کمپلیکس، پشاور یونیورسٹی، ایف جی پبلک سکول گرلز اسٹیڈیم روڈ پشاور، کبیر میڈیکل کالج پشاور، سٹی یونیورسٹی پشاور، عسکری 6 ناصر باغ روڈ، سی ایف سی ، جی آر پی، قصہ خوانی بازار اورہشتنگری بازار شامل ہیں۔