بھارت میں مودی حکومت کیخلاف احتجاج پر کانگریس رہنما راہول گاندھی اور پرینکا گاندھی گرفتار

نئی دہلی (اُردو پوائنٹ اخبارتازہ ترین - این این آئی۔ 11 اگست2025ء)بھارت میں حزب اختلاف کی سب سے بڑی جماعت کانگریس کے رہنما راہول گاندھی اور پرینکا گاندھی کو گرفتار کر لیا گیا۔ کشمیرمیڈیاسروس کے مطابق نئی دہلی میں ووٹ چوری کے خلاف پارلیمنٹ ہائوس سے الیکشن کمیشن کی طرف حزب اختلاف کے مارچ کے دوران پولیس نے راہول گاندھی کو گرفتار کیا۔بھارتی میڈیا کے مطابق راہول گاندھی تقریبا 300اپوزیشن اراکین کے ہمراہ الیکشن کمیشن کی طرف مارچ کر رہے تھے۔

اس موقع پر راہول گاندھی نے کہا کہ مودی حکومت بزور طاقت ہماری آواز دبانے کی کوشش کر رہی ہے، یہ لڑائی سیاسی نہیں بلکہ آئین کو بچانے کی ہے، یہ لڑائی ایک آدمی، ایک ووٹ کے اصول کے لیے ہے، ہم ایک صاف اور شفاف ووٹر لسٹ چاہتے ہیں۔

(جاری ہے)

مظاہرے کے دوران پولیس نے پرینکا گاندھی، سنجے راوت، ساگرِکا گھوش سمیت کئی رہنمائوں کو بھی حراست میں لے لیا۔

اپوزیشن اتحاد نے انتخابی فہرستوں میں مبینہ بے ضابطگیوں اور شفافیت کے فقدان کے خلاف شدید احتجاج کیا۔جوائنٹ کمشنر پولیس دیپک پوریہٹ نے گرفتاریوں کی تصدیق کرتے ہوئے کہا کہ اپوزیشن کو اس پیمانے کے احتجاج کی اجازت نہیں دی گئی تھی، صرف 30ارکان پارلیمنٹ کو الیکشن کمیشن جا کر شکایت درج کرانے کی اجازت تھی، لیکن 200سے زائد افراد مارچ کرتے ہوئے پہنچ گئے۔

ڈپٹی کمشنر پولیس دیویش کمار مہلا نے بتایا کہ کچھ ارکان نے رکاوٹیں پھلانگنے کی کوشش کی جس پر انہیں بھی حراست میں لیا گیا۔ کانگریس کے رہنما راہول گاندھی نے دو روز قبل کہاتھا کہ بھارتی الیکشن کمیشن نے بھارتیہ جنتا پارٹی کے ساتھ مل کر عام انتخابات میں ووٹ چرائے۔راہول گاندھی عام انتخابات میں دھاندلی کے ثبوت سامنے لائے اور کہاکہ انتخابات میں عوام کے حق پر ڈاکہ ڈالا گیا، ڈپلیکیٹ ووٹر آئی ڈیز بنائی گئیں اور کچھ حلقوں میں مکانوں کے جعلی پتے بنائے گئے جبکہ جعلی تصاویر کا بھی استعمال کیاگیا۔

راہول گاندھی نے کہاکہ پچھلے انتخابات میں بی جے پی، وزیراعظم نریندر مودی اور ان کے ساتھیوں نے آئین پر حملہ کیا، کم سے کم 100سے زیادہ نشستوں پر ہیرا پھیری کی گئی۔ انہوں نے بتایا کہ اگر جعل سازی نہ ہوتی تو نریندر مودی آج بھارت کے وزیراعظم نہ ہوتے۔راہول گاندھی نے کہا کہ الیکشن کمیشن جو کررہا ہے وہ غداری ہے۔