این پی سی اسلام آباد اور مینارٹیز جرنلسٹس ایسوسی ایشن کے اشتراک سے کیک کاٹنے کی تقریب،وزیرمملکت کھیئل داس کوہستانی سمیت دیگراہم شخصیات کی شرکت

اسلام آباد (اُردو پوائنٹ اخبارتازہ ترین - اے پی پی۔ 11 اگست2025ء) نیشنل پریس کلب(این پی سی) اسلام آباد  اور مینارٹیز جرنلسٹس ایسوسی ایشن کے اشتراک سے اقلیتوں کے قومی دن کے موقع پر این پی سی میں کیک کاٹنے کی خصوصی تقریب منعقد ہوئی ، تقریب کے مہمان خصوصی وزیر مملکت برائے مذہبی امور و بین المذاہب ہم آہنگی کھیئل داس کوہستانی تھے جبکہ مسلم لیگ (ن) کے رکن قومی اسمبلی رمیشن کمار وانکوانی،  ورلڈ مینارٹیز الائنس کے کنونیئر اورسابق وفاقی وزیر جے سالک،پی ایف یو جے کے صدر افضل بٹ، این پی سی سیکرٹری نیئر علی،پیر سید عاصم علی شاہ، عاصمہ ناز عباسی، آر آئی یو جے کے صدر طارق علی ورک، سابق صدر آئی سی سی آئی اور چیئرمین ڈی واٹسن گروپ ظفر بختاوری اور امریکہ میں مقیم سابق صحافی اور موجودہ کاروباری شخصیت نوید انور سمیت سینئر صحافیوں اور اقلیتی برادری سے تعلق رکھنے والی شخصیات نے کثیر تعداد میں شرکت کی۔

(جاری ہے)

تقریب کی نظامت کے فرائض سیکرٹری این پی سی نیئر علی نے سرانجام دیئے۔اس موقع پر مہمان خصوصی وزیر مملکت کھیئل داس کوہستانی نے کہا کہ پاکستان تمام مذاہب کا خوبصورت گلدستہ ہے، 11 اگست 1947 کو دستور ساز اسمبلی سے بانی پاکستان قائد اعظم محمد علی جناح کا خطاب اس بات کا واضح پیغام تھا کہ پاکستان میں تمام مذاہب کے لوگوں کو عبادات کی مکمل آزادی ہو گی اور آئین پاکستان میں بھی اس بات کو یقینی بنایا گیا ہے، پاکستان میں ہولی ہو یا دیوالی، عید ہو یا کوئی اور تہوار ،ہم سب ملکر اسے مناتے ہیں۔

انہوں نے کہا کہ یہ پاکستان کا روشن چہرہ ہے جسے دنیا کے سامنے لانے کی ضرورت ہے، ہم دوسروں کے مذہب کا احترام کرنے والی قوم ہیں،ہمارے ہمسایہ ملک کے وزیراعظم کے ہاتھ گجرات کے مسلمانوں کے خون سے رنگے ہوئے ہیں۔ انہوں نے کہا کہ پاکستان نے حالیہ معرکہ حق میں دشمن کے مندروں اور عام شہریوں کو نشانہ نہیں بنایاجو اس بات کا بین ثبوت ہے کہ پاکستان عالمی جنگی قوانین پر عمل کرنے پر یقین رکھتا ہے۔

اس موقع پررکن قومی اسمبلی رمیش کمار وانکوانی کا کہنا تھا کہ ملک میں بسنے والے اقلیتی افراد محب وطن ہیں اور ہر جنگ میں ہمیشہ صف اول میں کھڑے رہے ہیں۔پی ایف یو جے کے صدر افضل بٹ نے کہا کہ نیشنل پریس کلب نے 21 برس قبل ہی یہاں پر اقلیتوں کے حوالے سے کرسمس پروگرام کر کے بین المذاہب ہم آہنگی کا ٹرینڈ سیٹ کر دیا تھا، مینارٹیز کے حقوق کیلئے این پی سی عملی نمونہ اور پاکستان محبت کا گہوارہ ہے۔ تقریب سے سابق وفاقی وزیر جے سال، ظفر بختاوری، عاصمہ ناز عباسی، پیر عاصم علی شاہ ،نوید انور، مینارٹیز جرنلسٹس ایسوسی ایشن کے صدر ناصر سلیم و دیگر نے بھی خطاب کیا،تقریب میں ملی نغمے بھی پیش کئے گئے ۔