ملک پاکستان کے کروڑوں ڈالرز کے ڈیفالٹر نکلے، آڈٹ حکام کا بڑا انکشاف

پاکستان کئی سالوں سے پانچ مماک سے 30 کروڑ 45 لاکھ ڈالر واپس لینے میں ناکام

منگل 12 اگست 2025 15:57

اسلام آباد(اُردو پوائنٹ اخبارتازہ ترین - این این آئی۔ 12 اگست2025ء)پاکستان مختلف ممالک اورعالمی اداروں کا مقروض توہے مگر پانچ ایسے ملک بھی ہیں جو پاکستان کے ڈیفالٹرز ہیں۔5ملک پاکستان کے کروڑوں ڈالرز کے ڈیفالٹر نکلے۔دستاویزات کے مطابق ان ممالک میں سری لنکا،بنگلہ دیش، عراق،سوڈان اور گنی بسائوشامل ہیں۔آڈٹ حکام نے انکشاف کیا ہے کہ 40سال گزرنے کے باوجود حکومت پاکستان ان پانچ ملکوں سے 30کروڑ 45لاکھ ڈالر واپس لینے میں ناکام رہی۔

آڈٹ رپورٹ کے مطابق پاکستان نے اسی اور نوے کی دہائی میں ایکسپورٹ کریڈٹ دیا تھا،پاکستانی کرنسی میں قرض کی رقم 86ارب روپے سے زیادہ بنتی ہے،عراق کے ذمے پاکستان کے سب سے زیادہ 23 کروڑ 13لاکھ ڈالر واجب الادا ہیں،پاکستان نے سوڈان سے 4کروڑ 66لاکھ ڈالر وصول کرنے ہیں،بنگلہ دیش نے اپنے ذمے شوگر پلانٹ اورسیمنٹ کی مد میں 2 کروڑ 14لاکھ ڈالر ادا کرنے ہیں،پاکستان نے گنی بسائوسے بھی 36لاکھ 53ہزار ڈالر وصول کرنے ہیں۔

(جاری ہے)

آڈیٹرجنرل آفس نے 2006-07 میں اس ریکوری کی نشاندہی کی تھی۔حکام وزارت اقتصادی امورکاکہنا ہے کہ دفترخارجہ کے ذریعے ریکوری کیلئے کوشاں ہیں،ڈپلومیٹک چینل اور مشترکہ وزارتی کمیٹیز کے ذریعے بھی کوششیں کی گئیں،ان پانچ ملکوں کو یاددہانی کے خط اور ڈیمانڈ نوٹسزبھی بھجوائے گئے،آڈیٹر جنرل کی رقم ریکور کرنے کیلئے معاملہ مناسب سطح پر اٹھانے کی سفارش کی گئی ہے۔